OEKUSI, 05 Marsu 2026 (TATOLI) – Koordenadór Ekonomia Espesiál Dezenvolvimentu Oekusi Ambeno (ZEEDOA), Herculano de Sousa, fó-sai katak, Planu Dezenvolvimentu Estratéjiku (PED) Rejiaun Administrativa Espesiál Oekusi Ambeno (RAEOA), ba tinan-lima 2027 to’o 2031 define pilár prinsipál haat ba asuntu ekonomia, sosiál, infraestrutura no governasaun.
Herculano de Sousa, informa, perante konvoka reuniaun dahuluk ho ekipa Grupu Serbisu Tékniku (GST), ho objetivu atu disemina informasaun ba membru Grupu Serbisu Tékniku sira, kona-ba prosesu elaborasaun bazeia termu referénsia.
“Kontéudu husi planu dezenvolvimentu ne’e, la sees husi Planu Estratéjiku Dezenvolvimentu Nasionál (PEDN), husi RAEOA nian, ita haree liu ba pilár prinsipál haat, pilár ekonomia, pilár sosiál, infraestrutura no pilar ikus mak governasaun. Pilár haat ne’e ita sei tau hamutuk sai hanesan matadalan prinsipál Oekusi nian ba tinan-lima oin mai,” nia hateten ba Grupu Serbisu Tékniku sira iha salaun administrasaun Numbei, ohin.
Notísia relevante:Ajenda diskusaun PED Oekusi ba tinan lima sei hahú iha semana ne’e
Koordenadór ne’e informa, kalendáriu ba diskusaun Planu Estratéjiku Dezenvolvimentu Rejionál ne’e, nia durasaun fulan-haat, hahú iha Marsu ne’e sei finaliza iha fulan-Juñu hodi aprezenta ba Konsellu-Ministru atu hetan paresér.
“Ita hahú ona iha Fevereiru, estabelese Grupu Serbisu Tékniku, prepara termu referénsia, ita mós hahú ona kompilla dokumentu relevante sira-ne’ebé sei uza halo deskriviw ne’ebé la’o daudaun hela, maibé tuir ami-nia estimasaun sekuandu buat hotu la’o di’ak, ema hotu partisipa di’ak, entaun ita tarjetu (alvu) to’o inisíu fulan-Juñu, ita bele ona aprezenta ba Konsellu-Ministru atu hetan paresér no aprovasaun,” nia afirma.
Notísia relevante:Xanana husu Oekusi-oan hanoin ho reflesaun kle’an simu Governu Lokál iha 2027
Iha biban ne’e, João Muni, nu’udar partisipante intelektuál, konsidera diseminasaun ba Planu Estratéjiku Dezenvolvimentu rejionál ne’e, importante no estratéjia atu bele hatuur hanoin, problema, obstákulu no esperansa ba poténsia sira-ne’ebé eziste iha Oekusi.
“Planu ne’e importante ba Oekusi atu hakat ho konseitu ida ba ninia modelu dezenvolvimentu. Preokupasaun ne’e kle’ur ona, ema hotu hanoin kona-ba RAEOA, katak kapasidade, koñesimentu, skill (abilidade) sira-ne’e, atu hatuur iha ninia konseitu Planu Estratéjiku Dezenvolvimentu Rejionál nian,” nia hateten.
Tuir autoridade ne’e nia haree, esplikasaun iha termu referénsia kapaas tanba iha objetivu haat, mak presiza forma ekipa, kolabora informasaun, analiza informasaun ikuliu hakerek sai hanesan livru Planu Estratéjiku Dezenvolvimentu Rejionál.
“Objetivu haat ne’e tenke la’o tuir, Oekusi-oan tenke brani, hatuur ninia ideia no hatuur nia problema ho obstákulu, nune’e sai hanesan planu ida. Ne’ebé, ha’u agradese tanba brani hanoin di’ak husi Prezidente Autoridade, Koordenadór ZEEDOA no diretór sira hotu ko’alia ona ba planu ne’e, tanba ne’e hanesan baze legál ida, ba Oekusi-oan, sé de’it atu sai lideransa iha futuru, presiza dokumentu ne’e atu la’o tuir, labele ita serbisu no planu konforme ita-nia hakarak,” nia orgullu.
Notísia relevante:MPIE aprezenta relatóriu monitorizasaun PEDN 2011-2030 ba KM
Entretantu, Grupu Serbisu Tékniku ne’e mai husi Diretór no Xefe Departamentu inklui funsionáriu permanente no durasaun ba elaborasaun Planu Estratéjiku Dezenvolvimentu Rejionál ne’e durante fulan-haat sei finaliza iha fulan-Juñu 2026 hodi aprezenta ba Konsellu-Ministru atu hetan paresér no aprovasaun.
Jornalista: Abílio Elo Nini
Editór: Rafael Ximenes de A. Belo
