OEKUSI, 02 Fevereiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, segunda ne’e, informa katak ajenda diskusaun ba Planu Estratéjiku Dezenvolvimentu (PED) Rejionál Oekusi nian ba tinan lima, sei hahú iha semana ne’e.
Ajenda ne’e, tuir Autoridade RAEOA, mós hetan koñesimentu no autorizasaun husi Primeiru-Ministru Kay Rala Xanana Gusmão, nu’udar entidade tuteladu superentendente RAEOA nian, katak, Oekusi tenke iha nia PED rejionál ba tinan lima.
“Hot-hotu prepara-an komesa semana ida-ne’e. Ita hahú prosesu halo Planu Estratéjiku Dezenvolvimentu Rejionál Oekusi nian ba tinan lima. Iha planu estratéjiku ne’e, ita haree liu planu rejionál ba ita-nia rai, husi suku mai aldeia, família hotu-hotu, idak-idak mai to’o rejiaun, no planu ida kona-ba output-baze estratéjiku investment plant. Ne’ebé iha planu rua, funsionamentu administrativa no dezenvolvimentu integradu ba povu no ida seluk mak oinsá mak ita tenke iha planu ba investimentu estratéjiku ida tenke iha ba Oekusi,” nia hateten iha diskursu ofisiál isár bendera fulan-Fevereiru iha Palaban, ohin.
Notísia relevante:KM aprova dekretu-lei reestrutura estatutu RAEOA no ZEESM
Autoridade RAEOA ne’e subliña, iha elaborasaun planu estratéjiku hirak-ne’e, sei hahú husi distribuisaun kestionáriu no ekipa ida atu bele koordena planu estratéjiku ne’e sei estabelese ho despaxu ida no sei halo serbisu atu koordena prosesu ne’e tomak.
“Tanba ita-nia tempu sei to’o fulan-Juñu 2026, planu ne’e ita-nian ba tinan lima tenke aprova, no planu ne’e sei refleta nesesidade Planu Estratéjiku Dezenvolvimentu Rejionál faze daruak nian no planu estratéjiku ouput-base investiment plant,” nia hateten.
Nia espera semana ida-ne’e, bainhira ekipa tékniku kona-ba planeiamentu deklara, sei hala’o serbisu hahú husi distribuisaun kestionáriu tanba atu halo planeiamentu estratéjiku ida antes hala’o konsultasaun públika, tenke halo mós analiza situasionál ba setór hot-hotu no inklui halo avaliasaun ba Planu Estratéjiku Dezenvolvimentu Rejiaun faze dahuluk ba RAEOA no ZEESM-TL harii dahuluk husi périodu 2019 to’o 2023.
“Avaliasaun ne’e importante tanba iha dokumentu ne’e, harii ona indikadór barak kada setór, maibé depoizde planu ne’e aprova iha 2019 mai to’o 2023, indikadór dezenpeñu hotu, ne’ebé Autoridade RAEOA uluk to’o agora halo, la refleta indikadór bar-barak ne’e,” nia hateten.
Tanba ne’e, Autoridade másima RAEOA ne’e, rekomenda Diretór Rejionál Diresaun Rejionál Infraestrutura (DRI) ho ekipa tuun ba terrenu halo verifikasaun lalais ba projetu estrada rurál sira, hodi fó rekomendasaun mai, kona-ba empreza konstrutora sira ezekuta ona progresu fíziku pursentu hira ona.
“Ha’u presiza mak rezultadu verifikasaun analítiku la’ós lista hira mak prontu ba kontratu. Ha’u presiza mak ne’e, tanba buat hotu ne’ebé tenke halo ne’e ba povu, loke izolamentu fó empregu ba ita-nia povu no kapasitasaun ba setór privadu sira no halais modernizasaun transformasaun husi sidade ba to’o nível aldeia no bairru sira,” nia hateten.
Notísia relevante:Ekipa avaliadora deskobre pontu prinsipál haat iha Oekusi nesesáriu presiza hadi’a
Nune’e mós Diretór Diresaun sira seluk, presiza koñese nia funsionáriu sira, kontinua halo avaliasaun institusionál interna, hanesan foin daudaun Governu Sentrál halo ona, iha kedas formatu, presiza halo tuir, nune’e progresu serbisu la’o ho ekilibriu no serbisu barak tenke tuun ba suku no aldeia.
“Ha’u husu maun-alin sira, ita aproveita didi’ak konfiánsa ita hamutuk iha fulan haat kotuk no kontinua ba tinan ne’e, ita tenke halo netik buat ruma ba ita-nia povu iha époka ne’e ba Oekusi,” nia fó hanoin.
Notísia relevante:Xanana husu Oekusi-oan hanoin ho reflesaun kle’an simu Governu Lokál iha 2027
Jornalista: Abílio Elo Nini
Editór: Rafael Ximenes de A. Belo
