BAUKAU, 06 Maiu 2026 (TATOLI)—Prezidente Autoridade Munisipál (PAM) Baukau, Veneranda Eurico Lemos Martins, solisita autoridade lokál liuliu xefe suku hotu atu haka’as an serbisu maka’as hodi atinje meta ligadu ho programa no atividade iha tinan-ne’e.
Prezidente Autoridade Munisipál (PAM) Baukau, Veneranda Eurico Lemos Martins, konsidera xefe suku sira nu’udár líder komunitáriu ne’ebé sai implementadór ba programa no projetu sira ligadu ho Programa Nasionál Dezenvolvimentu Suku (PNDS) no Planu Dezenvolvimentu Integradu Munisipál (PDIM) ne’ebé prevee ona iha orsamentu ba tinan 2026.
“Ha’u husu atu serbisu maka’as nune’e programa ne’ebé trasa ona bele implementa ho di’ak no kualidade,” Veneranda Lemos hateten bainhira lidera reuniaun Konsellu Koordeansaun Munisipál (KKM) iha salaun apuramentu Vila Nova, Baukau, Kuarta ne’e.
Eis deputada ne’e husu mós ba Administradór Postu Administrativu ualu atu kontinua fó-atensaun ba ofisál PNDS no xefe suku sira liuliu halo koordenasaun serbisu mútua nune’e programa no atividade sira bele susesu tuir alvu.
Nia aprezenta katak progresu serbisu hanesan Programa Nasionál Dezenvolvimentu Suku (PNDS) tuir kalendáriu traballu sei hahú lansamentu simultaneamente fulan-ne’e iha suku hotu.
“PAM iha devér obriga instrumentu hotu liuliu dirijente sira atu serbisu no implementa programa sira-ne’e tuir kalendáriu maibé tenke kualidade tanba benefísiu iha baze,” Veneranda Lemos akresenta.
Autoridade Munisipál Baukau tinan-ne’e iha projetu PDIM hamutuk 29 ne’ebé foin iha faze aprovizionamentu ne’ebé hetan alokasaun orsamentu liuhusi kapitál dezenvolvimentu hamutuk $2.310.213,00 no atividade regulár PNDS iha projetu 78 ne’ebé hetan alokasaun orsamentu $2.427.434,00 husi fundu transferénsia públika hamutuk $ 7.725.580,00.
Enkuantu, AMB iha trimestrál dahuluk ezekuta orsamentu pursentu 17,18 husi totál orsamentu hamutuk $13.802.085,00 hanesan ezekusaun ba saláriu no vensimentu atinje pursentu 24,02, bens no serbisu ezekuta pursentu 58,41, transferénsia públika ezekuta pursentu 14,09, kapitál menór ezekuta ona pursentu 100 no kapitál dezenvolvimentu seidauk ezekuta tanba projetu PDIM sei iha faze aprovizionamentu.
Husi totál orsamentu hamutuk $13.802.085,00 fahe ba kategória lima hanesan saláriu no vensimentu $2.850.742,00, bens no serbisu $765.550,00, transferénsia públika $7.725.580,00, kapitál menór $150.000,00 no kapitál dezenvolvimentu hamutuk $2.310.213,00.
Jornalista: Natalino Belo
Editór: Xisto Freitas da Piedade
