DILI, 12 Maiu 2026 (TATOLI)–Atleta hamutuk na’in-neen (6) husi modalidade Taekwonde akompañadu husi ofisiál sira, halo despedida ho Ministru Juventude, Desportu, Arte no Kultura (MJDAK), Nelyi Isaac Sarmento, antes dezloka bá Mongólia hodi tuir kualifikasaun ba eventu Asian Games 2026 ne’ebé sei realiza iha nasaun Japaun tinan ne’e.
“Imi ba Mongólia la’ós atu kompete de’it, maibé imi lori bandeira no dignidade nasaun nian. Foku ba orientasaun treinadór no luta ho fuan tomak,” Ministru Juventude, Desportu, Arte no Kultura (MJDAK), Nelyi Isaac Sarmento, hameno ba atleta sira iha Salaun MJDAK, Lesidere, tersa ne’e.
Ministru ne’e husu ba públiku hotu atu fó apoiu másimu ba eroi foun Timor-Leste nian iha mundu desportiva atu lori vitória mai Timor-Leste.
“Sira ba ne’e atu foti sira-nia valór antes ba partisipa iha Asian Games 2026 iha Japaun. Ita fiar katak sira ba ne’e sei hatudu rezultadu ida-ne’ebé di’ak, bele aumenta tan sira-nia esperiénsia,” Nelyo dehan.
Iha biban ne’e, atleta Teresa Ximenes hateten preparasaun ne’ebé sira halo hamutuk ho treinadór sira sufisiente ona hodi be’e ba tuir kompetisaun ne’e.
“Ita-nia esperansa mak ne’e, iha preparasaun ne’ebé di’ak, iha mós rezultadu ne’ebé di’ak,” atleta ne’e hateten.
Atleta na’in-neen ne’e sei aranka ba Mongólia iha loron 18 fulan-Maiu tinan 2026 ne’e.
Kampionatu iha Mongólia nu’udar dalan kualifikasaun ba Asian Summer Games 2026 iha Japaun.
Atleta na’in-neen ne’ebé selesionadu ona sei kompete iha kategoria Kyorugi mak kompostu husi mane na’in-rua (2) no feto na’in-rua (2) no Poomsae ne’e mane ida (1) no feto ida (1).
Jogu iha Mongólia ne’e, Governu Konstitusionál da-sia (IX) liuhusi Ministér Juventude, Desportu, Arte no Kultura (MJDAK), apoiu orsamentu ba modalidade Taekwondo hamutuk rihun $35.
Jornalista : Hortencio Sanchez
Editór : Cancio Ximenes
