BAUKAU, 12 Maiu 2026 (TATOLI)—Governu liuhusi Ministériu Solidariedade Sosiál no Inkluzaun (MSSI), Tersa ne’e, apoia foos ba komunidade uma-kain hamutuk 129 iha Suku Bahú, Postu Administrativu Baukau Vila.
Diretór Sentru Solidariedade Sosiál no Inkluzaun Munisipiu Baukau, Albino Nicolao Freitas, esplika benefisiáriu hamutuk uma-kain 129 mak hetan apoiu ne’e kompostu husi kategoria vuneravel, Ema ho Defisiénsia (EhD) no idozu iha Suku Bahú bazeia ba pedidu autoridade suku iha tinan 2025.
“Tuir loloos oferese apoia iha tinan kotuk maibé mudansa estrutura entaun ohin mak foin hala’o,” Albino Nicolao Freitas hateten sede Suku Bahu Vila antiga, Tersa.
Albino Freitas relata objetivu husi apoiu referidu atu hakma’an komunidade nia nesesidade hanesan apoia ai-han komplementár hanesan mina-te’in, susu-been, foos no seluk tan.
Nia subliña razaun apoia de’it foos ba benefisiáriu iha Bahú tanba ai-han komplementár seluk iha loja kontratór estoke laiha, nune’e deside fahe foos kilógrama 25 hamutuk saka rua ba benefisiáriu sira.
“Ai-han komplementár sira laiha ona mak ita apoia foos ba kada família saka rua,” Albino Nicolao Freitas akresenta.
Iha fatin hanesan, Xefe Suku Bahú, Manuel Francisco Rodrigues Gusmão konsidera populasaun iha Suku Bahu mezmu lokalizadu iha urbana maibé misturadu nune’e identifika uma-kain 129 mak presiza iha apoia husi Governu liuhusi MSSI.
“Ita mós sei haree ba família kbiit laek sira ne’ebé mak di’ak tebetebes ne’ebé mak presiza apoia liuliu Ministériu Solidariedade nia apoiu,” Manuel Gusmão komenta.
Entretantu, MSSI apoia foos hamutuk saka 258 ne’ebé distribui ba benefisiáriu uma-kain hamutuk 129 husi aldeia 5 kompostu husi Aldeia Ana-ulo, Builé, Lamegua, Makasae no Ro-ulo.
Jornalista: Natalino Belo
Editór: Xisto Freitas da Piedade
