BAUKAU, 14 Maiu 2026 (TATOLI)—Família kestiona pasiente EX ne’ebé suspeita kontaminadu virus raiva la simu vasina kontra raiva durante akontese asu tata iha Aldeia Maukale, Suku Gariuai, Postu Administrativu Baukau Vila.
Reprezentante família husi pasiente EX, Agostinho Ximenes Belo, esplika bainhira nia inan asu tata dezloka kedas bá Ospitál Rejionál Eduardo Ximenes (HoREX-sigla portugeza) Baukau hodi hetan tratamentu kurativu no fó ai-moruk antibiótiku hodi deside fila bá uma enkuantu la halo vasina kontra raiva ba pasiente.
“Ami família la kontente ho atendimentu iha ospitál. Sira (médiku) mak hatene liu kona-ba moras ida-ne’e maibé halo família triste, tanbasá sira labele fó vasina kontra raiva iha momentu ne’ebá,” Agostinho Ximenes Belo hateten iha HoREX Vila Nova, Kinta ne’e.
Agostinho Belo konsidera loloos médiku sira presiza antesipa atu halo vasina kontra raiva ba pasiente bainhira hala’o tratamentu maibé pasiente alta parte família iha hanoin katak pasiente kondisaun rekupera ona, maibé mosu akontese fali sintoma raiva nune’e deside transporta hika’as ba HoREX Baukau, iha-ne’ebé médiku sira suspeita pasiente iha indísiu sintoma rabies.
Agostinho kestiona ekipa task force ba prevensaun raiva iha Baukau ne’ebé seidauk másimu tanba durante akontese asu tata pasiente iha fulan-Marsu to’o agora ekipa referida la prezente iha rezidénsia pasiente.
Notísia relevante; Sidadaun EX husi Gariuai suspeita kontaminadu raiva
“Ami família rona dehan sintoma rabies ami fuan moras ka sente triste,” Agostinho Ximenes Belo tenik.
Antes ne’e, parte HoREX klarifika ona razaun pasiente EX la hetan vasina tanba kestaun estoke ai-moruk vasina no mezmu suspeitadu kontamina virus raiva maibé sei hein rezultadu tanba iha hela faze ezaminasaun.
Entretantu, tuir informasaun, kazu raiva iha Baukau sa’e ona ba 14 iha-ne’ebé antes ne’e rejista hamutuk haat kompostu pozitivu rua no suspeitadu na’in-rua (kompostu ida akontese tata komunidade na’in-rua iha Aldeia Uaturau, Suku Gariuai, ida iha Aldeia Ana-Ulo Vila Antiga, Suku Bahú no rua seluk iha Watulete Vila Nova, Suku Tirilolo).
Jornalista: Natalino Belo
Editór: Xisto Freitas da Piedade
