BOBONARU, 14 Maiu 2026 (TATOLI) – Rai-halai kauza danus ba uma tolu, inklui bee-matan Shu-Legul iha aldeia Molop-Taz, suku Molop, postu administrativu Bobonaru, munisípiu Bobonaru.
Xefe Suku Molop, António Maia, konfirma katak uma tolu ne’e, ida antes ne’e hetan ona risku husi rai-halai no rua seluk dook husi fatin risku.
“Uma ida antes ne’e nakfera ona. Udan-boot horisehik ho horibainrua ne’e mak rai-halai estraga tiha uma rua ne’e, rai monu tama liu ba varanda”, nia informa via telefone.
Dezastre naturál ne’e la estraga sasán tanba uma-na’in hasai hotu no sira hela provizoriamente iha fámilia nia uma. “Ha’u informa ona ba APC atu mai fó apoia, maibé sira seidauk fó resposta”, nia relata.
Kona-ba bee-matan, rai taka tiha no provizóriu komunidade labele uza. “Ami sente susar, tanba bee-matan ne’e mak ami uza dezde tempu avó sira-nia. Komunidade iha aldeia Molop-Taz tomak uza mak ida-ne’e”, nia salienta.
Lembra katak rai-halai ne’ebé akontese iha loron 26 Abríl, danifika uluk uma-haat inklui estrada no iha kuarta loron 13 Maiu ne’e fó risku más ba Eskola Bázika Filiál Molop-Taz no uma ne’ebé besik.
Notísia relevante: Uma hitu no EBF Molop-Taz ameasada husi rai-halai
Jornalista: Sergio da Cruz
Editora: Maria Auxiliadora
