DILI, 17 Maiu 2026 (TATOLI)–Veteranu Vidal de Jesus ‘Riak Leman’, iha ámbitu Restaurasaun Independénsia ba dala-24, husu ba joven atu banati tuir kombatente iha ai-laran luta atu hetan independensia.
“Unidade nasionál uluk kedas funu laran, ita hamutuk halo funu to’o ohin loron. To’o kria rekonsilisaun. Dala balun ema dehan na’i-ulun sira la hamutuk, la ko’alia, maibé problema boot laiha tanba ita-nia Estadu la’o hela Governu funsiona, Parlamentu Nasionál di’ak hela. Maibé ha’u husu liuliu ba joven sira banati tuir avo ho apa sira ne’ebé halo funu iha ai-laran hodi hetan independénsia, tanba tenke koopera ho Estadu Governu liu-liu F-FDTL, PNTL hodi ita-nia selebrasaun restaurasaun independénsia 20 Maiu 2026 la’o di’ak no pás,” Riak Leman hato’o ba Ajénsia TATOLI, via telefónika, Domingu ne’e.
Notísia relevante : Vox Pop: Restaurasaun Independénsia ba dala-24, estudante sujere Governu kapasita rekursu umanu
Hanesan mós Prezidente Konsellu Kombatente Libertasaun Nasionál, nia dehan, kona-ba fortifika unidade nasionál no dezenvolvimentu sustentável nu’udar pilár fundamentál ba futuru Timor-Leste nian.
“Prosesu sira-ne’e lori Estadu ba futuru liuhusi kompromisu boot hanesan Konsellu Nasionál, apoiu ba parseiru dezenvolvimentu sira, no projetu restaurasaun ambiente ne’ebé importante tebes,” nia akresenta.
Riak Leman fundamenta, unidade nasionál la’ós de’it hosi na’i-ulun maibé ema hotu-hotu, liuliu jerasaun foun ne’ebé abanrua sei kaer no lidera Timor-Leste ne’e ho di’ak no futuru ne’ebé unidade, pás no justu.
Tuir nia, katak atu restaura independénsia ida-ne’e ema barak tantu mane feto, ferik-katuas, labarik kiik no joven barak mak fakar ran, soe isin no ruin hodi ohin loron harii Repúblika Demokrátika Timor-Leste ida-ne’e.
Kona-ba veteranu nia kondisaun, Riak Leman nota, veteranu maioria mak hetan ona benefísiu husi Estadu no Governu ida-ne’e.
“Ami veteranu maioria mak simu ona osan husi Governu. Hahú husi rejistu dahuluk to’o 2009, veteranu barak mak hetan benefísiu husi Estadu. Iha veteranu balun ne’ebé seidauk simu direitu maibé sei iha prosesu nia laran. Hanesan reklamasaun no kontestasaun hamutuk 61-resin sei aprova tan iha Juñu tinan-ne’e,” nia katak.
Jornalista : Osória Marques
Editora : Julia Chatarina
