OEKUSI, 18 Maiu 2026 (TATOLI) – Prezidente Autoridade Rejiaun Administrativa Espesiál Oekusi Ambenu (RAEOA), Régio da Cruz Salu, segunda ohin, realiza enkontru konjunta ho xefe suku 20 no xefe aldeia sira, jestór sub-rejiaun haat, Konsellu-Veteranu Oekusi, konfisaun relijioza sira, sosiedade sívil, intelektuál, juventude no seluk, indika ona ema na’in-43 nu’udar membru órgaun Konsellu-Konsultivu iha Oekusi, no tuir planu sei simu pose husi Ministériu Administrasaun Estatál (MAE) iha loron 22 Maiu 2026, sesta semana ne’e.
“Ohin, ami finaliza ona nomeasaun finál ba kompozisaun membru órgaun Konsellu-Konsultivu RAEOA nian, hamutuk na’in-43, no deside ona preparasaun tomada pose sei akontese iha loron sesta 22 Maiu semana ne’e,” nia hateten ba jornalista sira iha salaun administrasaun Oekusi, segunda ohin.
Notísia relevante:MAE introdús kompeténsia no kompozisaun atu harii Konsellu-Konsultivu iha Oekusi
Régio Salu, esplika, definisaun Konsellu-Konsultivu bazea dekretu-lei númeru 1/2026, prevista iha artigu 14.o ne’ebé estipula katak, Konsellu Konsultivu mak órgaun konsultativu Autoridade mak Prezidente RAEOA.
Ho nia misaun, bazeia diploma ministeriál 51/2016, prevista iha artigu 3.o, órgaun ne’e dezempeña papél hodi promove partisipasaun ajente sosiál no forsa ativa lokál iha prosesu formulasaun, diskusaun no ezekusaun instrumentu planeamentu estratéjiku autoridade munisipál, akompaña no avalia prestasaun bens no serbisu públiku autoridade rejionál ba sidadaun sira.
“Ohin hothotu apár ona, tanba partisipasaun iha enkontru ne’e, maioria partisipa másima, mai husi xefe suku 20 ho nia aldeia sira inklui lia-na’in kada suku, partidu polítiku, veteranu, juventude, inklui parte igreja nian, mezmu iha balun la marka prezensa maibé liuhusi kontaktu, konfirma katak sira prontu ba Konsellu-Konsultivu ne’e,” nia hateten.
Notísia relevante:RAEOA sei estabelese Konsellu-Konsultivu atu reforsa polítika Prezidente Autoridade
Nia hateten, indikasaun ba kompozisaun órgaun Konsellu Konsultivu Rejionál ne’e, bazeia dekretu-lei 1/2026 artigu 16.o, membru Konsellu Konsultivu kompostu hosi, Prezidente Autoridade RAEOA Sekretáriu no Rejionál na’in-tolu.
Reprezentante sira maka xefe suku, veteranu na’in-rua, setór privadu na’in-rua, intelektuál, juventude, konfisaun relijioza sira, organizasaun igualdade jéneru, partidu polítiku neʼebé hetan asentu iha Parlamentu Nasionál, lia-na’in, reprezentante ida husi Komisaun Funsaun Públika.
Tanba ne’e, nia dehan, Konsellu-Konsultivu ne’e, nia funsionamentu ne’e atu prepara implementasaun podér lokál, bainhira to’o tempu implementa, ema hotu hatene ona katak, ita kapasitadu ona, atu bele hala’o kna’ar reprezenta lian povu ho interrese bai ta-nia suku hothotu no kamada sosiál polítika ekonomia ba dezenvolvimentu ne’ebé sustentavel no reziliente iha rai ne’e.
“Tanba ita hakarak prosesu dezenvolvimentu ne’e, inspiradu mai husi lian povu, sentimentu povu no objetivu povu,” nia afirma.
Iha biban ne’e, Jestór sub-rejiaun Oésilo, Benedito Ulan, espera katak ho estabelesimentu órgaun Konsellu-Konsultivu ne’e bele kontribui ba prosesu dezenvolvimentu.
“Estabelesimentu Konsellu-Konsultivu ne’e, ita-nia esperansa, atu ba oin, akumula entidade hotu sira-nia preokupasaun ho opiniaun sira, liuhusi enkontru konsultivu sira-nia reprezentante,” nia orgullu.
Jornalista: Abílio Elo Nini
Editór: Rafael Ximenes de A. Belo
