OEKUSI, 18 Maiu 2026 (TATOLI) – Grupu Defisiénsia Soru-Tais Paineno iha aldeia Oéfoko suku Boboksae sub-rejiaun Rejiaun Administrativa Espesiál Oekusi Ambenu (RAEOA), rekomenda ba Governu atu apoia mákina suku Tais.
Koordenadora Grupu Defisiénsia Soru-Tais Paineno, Antánia Tani, hato’o rekomendasaun ne’e, iha ámbitu vizita Vise-Ministra Solidariedade Sosiál no Inkluzaun Ceo Brites, iha Oekusi, foin lalais ne’e.
“Agradese tanba ohin bele mai to’o ami-nia fatin, hodi haree direitamente, tanba ami-nia atividade halo Tais, hanesan salendan, tas (pasta), faru, sapeu no seluktan, depois ami fa’an, dalaruma husi Autoridade RAEOA mós mai sosa iha ne’e, maibé ami triste, mákina atu suku mak laiha, baibain ema impresta ema nian, depois ami fahe osan, tanba ami laiha mákina. Ho vizita ne’e, ami espera ba futuru bele apoia netik ida atu fasilita ami-nia atividade ne’e,” nia hateten iha sede grupu Grupu Defisiénsia Soru-Tais Paineno, foin lalaís ne’e.
Notísia relevante:Inan ida nia luta no esperansa ba ‘dignidade’ iha kadeira roda leten
Inan ho defisiénsia fízika ne’e, informa, Grupu Defisiénsia Soru-Tais Paineno ne’e, hahú forma iha 2013 to’o ohin loron, maibé seidauk hetan apoia ruma husi Governu.
“Tanba ne’e ami husu atu tau matan mai ami-nia grupu ho membru na’in-15 maioria feto hotu, na’in-14 foku ba soru-Tais no na’in-ida responsabiliza ba suku nian, baihira soru hotu, nia mak lalín ba suku tanba ami aluga ema nia mákina suku roupa nian, ami husu ajuda bele tau matan,” nia hateten.
Nia énfaze, durante tinan barak partisipa ona iha eventu loron boot sira liuhusi feira produtu lokál, Grupu Defisiénsia Soru-Tais Paineno, mós partisipa hatudu sira-nia produtu, no konsege hetan osan hodi sustenta nesesidade família.
“Ami kuandu hetan osan, kada fulan neen ami fahe, balu selu oan sira-nia eskola balu uza ba han hemu, tanba ami-nia pendapatan ki’ik, tenki selu mákina nian ketak, ida-ne’e maka ami lakon, maske ita faan, laku barak, maibé selu mákina mak karun, maibé ami nafatin esforsa, tanba ne’e ami serbisu,” nia hateten.
Notísia relevante:AHDRO husu sosiedade hapara diskriminasaun ba ema ho defisiénsia
Hatan ba rekomendasaun ne’e, Vise-Ministra Solidariedade Sosiál no Inkluzaun, Ceo Bristes, promete Governu liliu MSSI, sei konsidera liuhusi programa apoia pontuál, maibé grupu sira presiza submete proposta
“Kona-ba sira nia apoia, ita tenke simu lai sira-nia proposta, mákina ita haree osan hira, baibain hanesan ne’e, ita simu lai sira nia proposta, ita tenki haree envolve osan hira, tanba MSSI mós iha programa ida naran apoia pontuál, programa ne’e fó dalan, ita-bele apoia saida de’it, liliu ita-nia sidadaun sira ho defisiénsia, entaun agora ita hein lai sira-nia proposta,” nia promete.
Notísia relevante:Governu-UNICEF lansa fatin asesibilidade públiku ba ema ho difisiénsia
Jornalista: Abílio Elo Nini
Editór: Rafael Ximenes de A. Belo
