DILI, 18 Maiu 2026 (TATOLI)—Primeiru-Ministru, Kay Rala Xanana Gusmão, hamutuk ho Vise-Primeiru-Ministru, Ministru Koordenadór Asuntu Ekonómiku no Ministru Turismi Ambiente, Francisco Kalbuadi Lay, akompaña lia-na’in husi Aileu Mota Ain Karketu halo rituál molok implementa projetu konstrusaun Sentru Konvensaun Internasionál iha Portu Dili.
Lia-Na’in husi Aileu Mota-Ain Karketu, Gregório Rodrigues Saldanha, hateten rituál ohin ne’e ho sentidu katak molok atu hahú halo konstrusaun boot ida-ne’e lia-na’in sira hotu tenke mai hamutuk iha fatin ida-ne’e hodi hasees tiha enerjia negativu husi fatin ne’e.
“Atu nune’e, prosesu konstrusaun ne’e bele la’o ba oin ho di’ak to’o ramata, tanba natureza Timor ne’e bele akontese hanesan inundasaun no seluk tan,” Lia-Na’in husi Aileu Mota-Ain Karketu, Gregório Rodrigues Saldanha, hateten ba jornalista sira iha Portu Dili, ohin.
Tanba ne’e, nia dehan, ohin halo ritual oho manu no fahi hodi foti nia urat haree ne’e hatudu sinál pozitivu ka laiha sinál negativu ruma.
“Sinál husi manu nia ain loos hanesan iha nia ain karuk ne’e hatudu sinál di’ak sei la akontese buat ida, enkuantu kona-ba fahi nia urat mós hanesan,” nia dehan.
Nia hateten, maske iha fahi nia nanal ne’e iha sanak uitoan maibé ne’e simbólu ne’ebé atu tara iha nia fatin, atu nune’e bainhira udan boot no rai-lakan mós prosesu konstrusaun ne’e bele la’o ho di’ak.
Entretantu, projetu konstrusaun Sentreu Konvensaun Internasionál ne’e sei implementa husi kompañia Shaanxi Construction Engineering Group Corporation.
Jornalista : Alexandra da Costa
Editór : Cancio Ximenes
