DILI, 19 Maiu 2026 (TATOLI) — Embaixadór Emiradus Árabes Unidus (EAU) ba Timor-Leste no Indonezia, Abdulla Salem Al Dhaheri hato’o ninia apresiasaun ba Timor-Leste nia estabilidade demokrátika no kresimentu dezenvolvimentu durante tinan 24 restaurasaun independénsia.
Deklarasaun ne’e hato’o husi Abdulla Salem Al Dhaheri hafoin remata inkontru ho Prezidente Konsellu Diretivu, Noémio Mateus Soares Falcão ne’ebe akompaña mos Vise-Prezidente asuntu Administrasaun no Finansa, Madalena Pereira Carlos ho Vise-Prezidente asuntu Mídia no Jornalístika, Zezito da Silva iha Farol, tersa-feira ne’e.
“Lori governu Emiradus Árabes Unidus nia naran, ami hato’o ami-nia parabéns ba Loron Restaurasaun Independénsia ba dala 24 ba Repúblika Demokrátika Timor-Leste no povu Timor-Leste tomak,” hatete Abdulla Salem Al Dhaheri.
Nia hatutan katak governu Emiradus Árabes Unidus mós hato’o ona saudasaun no parabéns husi Prezidente Emiradus Árabes Unidus, Mohammed bin Zayed Al Nahyan, ba governu no povu Timor-Leste.
Iha vizita ne’e, Embaixadór Emiradus Árabes Unidus revela katak governu Emiradus Árabes Unidus no governu Timor-Leste sei hahú projetu konstrusaun dormitóriu estudante feto nian, ho serimónia lansamentu ne’ebé marka ona ba loron 20 fulan Maiu, koñesidu ho Loron Restaurasaun Independénsia Timor-Leste nian.
Nia esplika katak projetu ne’e nu’udar kooperasaun dahuluk entre nasaun rua ne’ebé foka liu ba relasaun ema ho ema (people-to-people project).
“Projetu ne’e sei ajuda estudante feto sira hetan fatin ne’ebé seguru no di’ak liu hodi apoia sira-nia ambiente edukativu. Ida-ne’e la’ós projetu ikus, maibé projetu dahuluk,” Nia hatete.
Abdulla Salem Al Dhaheri hatutan tan katak Emiradus Árabes Unidus sei kontinua buka oportunidade foun ba kooperasaun ho Timor-Leste, inklui iha área sira ne’ebé bele kria oportunidade servisu ba povu timor-oan.
“Ami sempre buka área kooperasaun nian ne’ebé bele fó valór akresentadu no loke oportunidade foun sira ba povu timoroan. Ami nakloke atu diskute oportunidade oioin ba kolaborasaun iha futuru,” Nia hatutan.
Kona-ba Timor-Leste nia dezenvolvimentu durante tinan 24 nia laran, nia avalia katak nasaun ne’e hatudu kresimentu pozitivu no estabilidade ne’ebé forte.
“Timor-Leste hanesan demokrasia ida ne’ebé estável, seguru tebes no konfiável. Ami haree kresimentu no oportunidade sira iha nasaun ida-ne’e. Emiradus Árabes Unidus sei sai nafatin belun di’ak ida ba Timor-Leste,” nia hatete.
Iha okaziaun ne’ebá, Embaixadór Emiradus Árabes Unidus mós hato’o ninia apresiasaun ba governu Timor-Leste tanba ninia solidariedade no apoiu ba nasaun sira Golfu nian, partikularmente Emiradus Árabes Unidus, relasiona ho tensaun rejionál ne’ebé akontese iha loron 28 fulan Fevereiru liubá.
Nia avalia katak relasaun besik no solidariedade entre nasaun rua ne’e sei hametin liu tan kooperasaun bilaterál iha futuru.
Jornalista : Cidalia Fátima
Editora : Armandina Moniz
