VIKEKE, 20 Maiu 2026 (TATOLI)—Komemorasaun Restaurasaun Independénsia ba da-XXIV (20 Maiu 2002-20 Maiu 2026), Prezidente Autoridade Munisipál Vikeke, Francisco C. S. de Gonzaga Soares, apela ba komunidade no joven sira iha Munisípiu Vikeke hametin unidade no tenke sai ema ida de’it hodi hamutuk dezenvolve Munisípiu Vikeke.
“Ohin ita hakat ona bá tinan 24 ukun an, ita hakarak povu nafatin saida ema ida, mai hanoin ida, ulun ida no fuan ida tanba ita hakarak hanoin ba dezenvolvimentu ba povu nia moris di’ak iha Munisípiu Vikeke. Tanba ne’e ita tenke sai ema ida hodi ko’alia ba dezenvolvimentu ne’e povu presiza kontribui ba prosesu dezenvolvimentu,” PAM Vikeke ba jornalista sira hafoin ramata isár bandeia iha resintu Munisípiu Vikeke, Kuarta ne’e.
Autoridade ne’e aprofunda povu labele fahe malu hodi kria grupu ida rua mak halo dezenvolvimentu, balun sai fali asiste-na’in, ida-ne’e labele akontese iha Munisípiu Vikeke.
“Konvida komunidade iha Munisípiu Vikeke atu kontinua promove toleránsia, respeita malu ho espíritu fraternidade iha-ne’ebé moris loroloron tenke hamutuk hodi fó apoiu malu ba programa sira,” nia sujere.
Nune’e, Francisco dehan, desentralizasaun no podér lokál sai dalan úniku ba libertasaun povu no presiza emvolve ema hotu iha siklu ida-ne’e.
Entretantu, partisipa iha serimónia isár bandeira ba loron restaurasaun independénsia ne’e kompostu husi Komandante Polísia Nasionál Timor-Leste (PNTL) Munisípiu Vikeke, veteranu, funsionáriu, estudante no populasaun.
Aselera dezenvolvimentu
Komemorasaun Loron Restausaun Independénsia 20 Maiu ba da-24, sosiedade sivíl Munisípiu Vikeke sujere aselera dezenvolve setór haat hanesan edukasaun, agrikultura, ekonomia no infraestrutura hodi liberta povu iha área remota.
Diretór Ezekutivu Fundasaun Knua Haberan Komunidade (F-KHK) Munisípiu Vikeke, Augusto Pinto haktuir, presiza aselera setór importante sira atu liberta povu husi mukit no ki’ak.
“Ami espresa ami-nia hanoin katak presiza aselera dezenvolvimentu ekonomia iha ita-nia komunidade, inklui dezenvolvimentu edukasaun, agrikultura, infraestutura bázika hodi komunidade sira iha área rurál sente ba ukun rasik-an para atinje objetivu libertasaun povu,” Augusto tenik.
Nia haktuir durante ne’e sosiedade sivíl haree ba setór edukasaun, ekonomia, infraestutura no agrikultura la’o, maibé sei hakdasak tanba kada tinan alokasaun orsamentu ba setór haat ki’ik.
“Setór sira-ne’e importante ba povu, maibé Governu la tau prioridade. Tan ne’e, ami husu Governu tenke tau orsamentu boot ba setór sira-ne’ebé ami sita,” nia afirma.
Iha fatin ketak, sobrevivente Masakre 12 Novembru, Emídio Amaral, prefer aselera dezenvolvimentu sira atu povu bele sente ukun rasik-an.
“Ami hakarak husu ukun-na’in sira presiza aselera dezenvolvimentu liuliu infraestrutura bázika sira tanba Munisípiu Vikeke oras-ne’e estrada aat barak no ponte mós kotu barak, maibé seidauk hadi’a. Tan ne’e, iha komemorasaun ne’e hakarak husu hadi’a infraestrutura atu labele difikulta povu Munusípiu Vikeke”, nia sujere.
Iha fatin hanesan, joven Munisípiu Vikeke, Celestino Rangel Pinto, haktuir ukun rasik-an tinan 24 ona, maibé infraestutura mak sai dezafiu ba povu Vikeke liuliu liga ba estrada sempre difikulta populasaun hodi buka moris.
“Tan ne’e, ami juventude hakarak sujere ba Governu tau-atensaun másima ba infraestutura sira, nune’e povu bele sente ukun rasik-an. Se lae povu kontinua terus ba infraestrutura sira iha Munisípiu Vikeke,” nia tenik.
Jornalista: Vitorino Lopes da Costa
Editóra: Xisto Freitas da Piedade
