OEKUSI, 22 Maiu 2026 (TATOLI) – Kuda 57 inklui kuda inan haat mai husi sub-rejiaun haat, Oésilo, Pássabe, Nítibe inklui Pante Makasar kompete malu hodi komemora loron Restaurasaun Independénsia 20 Maiu ba dala-24 iha suku Cunha Rejiaun Administrativa Espesiál Oekusi Ambenu (RAEOA).
Notísia relavante:PM Xanana halo abertura ba kompetisaun “Corrida Cavalo” iha RAEOA
Kompetisaun ne’e, abertura husi Sekretáriu Rejionál ba Asuntu Administrasaun no Finansa, Salvador da Cruz, reprezenta Prezidente Autoridade RAEOA, konsidera, objetivu husi eventu ne’e atu anima komunidade sira ba komemorasaun loron Restaurasaun Independénsia 20 Maiu ba dala-24 iha Oekusi.
“Anima ita hotu, nune’e ita haksolok hamutuk, tanba loron Restaurasaun Independénsia 20 Maiu bele temi katak ita-nian hotu, la’ós ema ida ida nian, ida-ne’e maka importante, ne’ebé ha’u husu ba kompetitór sira, labele hanoin de’it prémiu maibé oinsa bele promove dame páz liuhusi animasaun ne’e,” nia hateten iha aberrura hala’o iha suku Cunha, kinta ne’e.
Notísia relavante:Kuda ida mate antes tama iha arena kompetisaun
Iha biban ne’e, Prezidente Asosiasaun Korrida Kavalo Oekusi Ambeno (AKKOA), Mario Muni Salu, hateten, kuda 57 ne’e komposta husi kuda inan haat no kuda aman 53, maioria kuda lokál, no eventu ne’e hetan apoia másimu husi Autoridade RAEOA no empreza lokál Irmão Timor no Jenírsia Unipesoál Lda.
“Kompetisaun ne’e iha kuda 57 mai husi sub-rejiaun haat, tanba atividade ne’e atu anima povu Oekusi, liuhusi kompetisaun korrida kavalo lokál, hanesan desportu komunitária ida, ne’ebé bei-ala sira husik hela mai ita durante tempu naruk, ita nu’udar jerasaun kontinuadór tenki hamoris fali,” nia hateten.
Tuir Asosiasaun Kurida Kavalo Oekusi Ambeno nia espera katak ba futuru, kompetisaun korrida kavalo sei bele sai indústria ida iha Oekusi, tanba kompetisaun referida, kuandu hakarak la’o di’ak, dezenvolvimentu animál istimadu hanesan kuda folin sei di’ak, atrai setór sira seluk, bele hetan benefisíu ekonómia.
“Kuandu haki’ak kuda ona, kuda tenki han batar, hare u’ut, du’uk no presiza mós, entaun setór agrikultura mós bele hetan benefisíu,” nia hateten.
Notísia relevante:Pordasi NTT prepara kuda 40 hodi partisipa iha kompetisaun korrida cavalo
Tuir observasaun jornalista Ajénsia Tatoli, I.P nota katak, durante eventu kompetisaun ne’e realiza, hetan apoia seguransa másima husi Komandu PNTL Oekusi no hetan mós asisténsia saúde husi Serbisu Nasionál Ambulánsia Emerjénsia Medikamentu, Institutu Públiku (SNAEM, I.P).
Jornalista: Abílio Elo Nini
Editór: Rafael Ximenes de A. Belo
