DILI, 26 Maiu 2026 (TATOLI)—Mehi boot husi klube promovidu Segunda Divizaun Vila Atauru FC hakarak hamonu ekipa jigante FIEL FC iha jogu abertura Liga Futeból Timor-Leste (LFTL) Segunda Divizan, maibé mehi ne’e hela de’it mehi tanba FIEL firme hodi hatuur nia dignidade hanesan ekipa antigu no hakoi mekipa Vila Atauru nia mehi ho golu úniku.
Jogu ba ekipa rua hala’o iha Estádiu Munisipál Dili, tersa kalan ne’e, iha ne’ebé anima husi adeptu atus ba ats hodi fó apoiu másimu ba ida-idak nia ekipa futeból.
Vila Atauru FC mai ho prinsipiu, ambisaun husi treinadór Florindo Fereira no kapitaun ekipa Hasan Ramos hakarak hamonu duni ekipa antigu LFTL ne’e, maibé ambisaun hotu hela de’it ho naran.
FIEL la fó nia pontu fraku, hamriik metin hanesan foho ida be aas la nakdoko, hodi hasoru laloran Vila Atauru ne’ebé mai ho anin si’ak, FIEL hatudu nia forsa nu’udar ekipa antigu hodi enfrenta laloran no anin si’ak Atauru nian.
Jogadór sira FIEL nian hamriik metin hodi tuba metin iha kampu laran, rona de’it orientasaun husi treinadór, sira firme duni ho objetivu tenke manán jogu ne’e.
Ho prinsipiu ne’ebé metin, FIEL hatudu duni jogu bonitu, bainhira minutu primeira parte hahú ekipa rua lansa kedan kontra no atake ba malu tuir tékniku no abiliade jogadór ida-idak nian atu prodús golu.
Vila Atauru tun ho formatu ne’ebé hakarak halo moe FIEL hanesan ekipa jigante no esperiénsia kle’an, sira halo kontra no atake ne’ebé adekuadu, avansadu Atauru tenta halo xutu barak maibé xutu sira-ne’e nunka kona iha alvu.
FIEL FC la nonook responde ho atake ne’ebé kalma, la ansi halo golu bainhira seidauk hetan oportunidade, pasa bola husi ain ba ain, fintas ba fintas mai, halo jogadór Atauru halai ho iis naruk.
Maibé Atauru la rende, kontinua reziste husi minutu ba minutu, maibé labele prodús golu, basá defeza FIEL solidu no konbina di’ak tebes ho guarda rede, ikus la rezulta duni golu.
FIEL FC mós tenta halo atake maibé seidauk kona iha alvu, duelu entre ekipa rua sai manas liutan bainhira anima husi adeptu sira, maibé golu ladauk akontese, nune’e to’o minutu primeira parte termina, laiha ekipa ida prodús golu no provizóriu ekipa rua empata 0-0.
Tamaba segunda parte, ekipa rua nafatin hatudu forsa iha jogu, intensidade jogu sa’e maibé Atauru hahú monu iha lina klaran, ladun kontrola bola ho di’ak, FIEL tama ho oportunidade bonitu, sira konbina malu di’ak husi jogadór sira-nia ain, maibé xutu sira seidauk kona iha alvu.
Maibé iha minutu 67 sorte di’ak hahú monu ba FIEL liuhusu jogadór Lourenco Ximenes konsege halo jogu individu no fura rede Atauru hodi muda rezultadu ba 1-0.
Golu ne’e sadik liutan Atauru nia emosaun iha kampu laran, maibé Atauru kontinua la kontrola bola ho di’ak, FIEL hahú jogu ho kakutak matenek, dada oras no pasa bola ba-mai hodi hein tempu jogu termina, ikus estratejia FIEL nian sai duni realidade tanba to’o jogu termina vitória hela ba FIEL ho golu 1-0, hodi rekolla pontu tolu (3), enkuantu Atauru hela ho pontu zero.
Husi vitória FIEL nian ne’e, hatudu momoos ona katak durante abertura iha LFTL Segunda Divizaun FIEL nunka lakon no ida-ne’e sai ona istoria ba ekipa FIEL FC.
Jornalista : Hortêncio Sanchez
Editór : Cancio Ximenes
