DILI, 26 Maiu 2026 (TATOLI) – Tribunál Konta fó ona vistu ba konstrusaun projetu terminál pasajeiru Aeroportu Internasionál Prezidente Nicolau Lobato (AINPL) Komoro, Dili, iha semana kotuk.
Ministru Transporte no Komunikasaun, Miguel Marques Manetelu, dehan iha semana ida-ne’e nia sei hasai notice no kontinua fó hatene ba empreza Toa Corporation ne’ebé responsabiliza ba obra konstrusaun terminál pasajeiru ne’e.
Nia mós dehan katak Departament of Foreign Affairs and Trade (DFAT) presiza halo ajustamentu balun, no hein katak Ministériu Finansa bele konklui lalais ajustamentu sira ne’e, atu DFAT bele hahú prosesu konkursu públiku ba asesu Aeroportu Internasionál Nicolau Lobato nian.
Esforsu sira ne’e hotu Governu halo nu’udar preparasaun ba iha Simeira ASEAN tinan 2029 iha ne’ebé Timor-Leste mak sei sai uma-na’in.
Lembra katak, iha 20 Fevereiru 2026, Ministru Transporte no Komunikasaun selebra ona kontratu ho empreza Toa Corporation iha Japaun, atu konstrui terminál pasajeiru foun ne’e.
Serimónia asinatura kontratu ne’e hala’o iha Embaixada Timor-Leste iha Tokyo-Japaun, ne’ebé hetan sasin diretamente husi Embaixadora Timor-Leste ba Japaun, Maria Teresinha da Silva Viegas.
Notisía relevante: MTK selebra kontratu ho empreza Toa Corporation Japaun konstrui terminál Aeroportu Komoro
Antes ne’e, iha 03 Fevereiru 2025, Ministériu Transporte no Komunikasaun (MTK) ho konsórsiu konsultór aeroportu husi Japaun nian asina mós ona kontratu servisu konsultoria ba AIPNL iha Komoro.
Kontratu ne’e asina hodi finaliza dezeñu finál terminál pasajeiru nian, ne’ebé hetan apoiu husi Ajénsia Kooperasaun Internasionál Japaun nian (JICA).
Kontratu ne’e asina husi Diretór-Jerál MTK, Constantino F. Soares, no Xefe Ekipa husi konsórsiu konsultór aeroportu Japaun nian ne’ebé kompostu husi Ehira Architects and Engineers, Inc, Oriental Consultants Global Co., Ltd., no Nippon Koei Co., Ltd.
Ba konstrusaun aeroportu ne’e, Governu deside ona prosedimentu aprovizionamentu liuhusi prosesu naruk, ne’ebé empreza manán-na’in iha rua mak hanesan PT. Waskita Karya husi Indonézia, liuhusi parseria ho PT. Amtyhas mak kaer obra ba espansaun pista no infraestrutura ho totál orsamentu millaun $72,5 no jestaun projetu ho verba millaun $6,28.
Aleinde ne’e, empreza husi Japaun ne’ebé konstrui terminál pasajeiru ho orsamentu besik millaun $37,5, ne’ebé verba ne’e prevee husi Governu Timor-Leste no husi povu japonés.
Jornalista: Arminda Fonseca
Editora: Maria Auxiliadora
