DILI, 28 Maiu 2026 (TATOLI)-Komisaun C ne’ebé trata Asuntu Finansa Públika sujere ba Governu atu adota medida urjente hodi mellora ezekusaun verba alokasaun orsamentál iha área kapitál dezenvolvimentu.
Deputada Aliança Araújo hato’o rekomendasun ne’e bainhira halo leitura ba relatóriu no pareser Komisaun nian ba apresiasaun inisiál iha debate proposta Orsamentu Retifikativu ho karáter urjénsia iha faze jeneralidade, iha sala plenária Parlamentu Nasionál, ohin.
Tuir pareser Komisaun nian, Governu presiza adota medida urjente no konkretu hodi mellora kapasidade ezekusaun kapitál dezenvolvimentu, tanba to’o iha 19 Maiu 2026, taxa ezekusaun foin atinje 6,6%.
Komisaun mós ba Governu atu simplifik prosedimentu kontratasaun públika, reforsa kapasidade téknika ministériu implementadór sira, mellora planeamentu projetu no adota mekanizmu atu aselera ezekusaun orsamental. Medida hirak ne’e importante atu evita reprogramasaun rekursu ne’ebé bele kompromete objetivu dezenvolvimentu médiu no longu prazu.
Aleinde ne’e, Governu presiza asegura katak reprogramasaun ka redusaun projetu investimentu la kompromete infraestrutura estratéjika, serbisu públiku esensiál no kreximentu ekonómiku, tuir objetivu Planu Estratéjiku Dezenvolvimentu.
Iha pareser refere mós katak Komisaun rekomenda ba Parlamentu Nasionál atu, durante debate espesialidade ba proposta lei OR, halo análize kuidadu ba proposta alterasaun artigu 48 husi Lei númeru 3/2025, loron 23 Abríl, kona-ba Lei Enkuadramentu Orsamentu Jerál Estadu no Jestaun Finanseira Públika.
Komisaun konsidera natureza pluriannual no espesifisidade operasionál Fundu Infraestrutura importante atu garante fleksibilidade liután iha ezekusaun projetu estratéjiku Estadu, maibé seidauk kompromete prinsípiu transparénsia sira, fiskalizasaun no kontrolu orsamentál.
Notísia relevante: https://tatoli.tl/2026/05/21/mudansa-lei-aprovizionamentu-halo-ezekusaun-fundu-infraestrutura-foin-atinje-91/
Jornalista: Nelson de Sousa
Editora: Maria Auxiliadora
