BAUKAU, 28 Maiu 2026 (TATOLI)—Komunidade solisita Governu atu aselera prosesu kanalizasaun sistema bee-moos husi Bee Timor-Leste, Empreza Públika (BTL, E.P.) iha Munisípiu Baukau.
Responsavel BTL Baukau, Adriana Belo da Rosa, esplika komunidade hato’o ezijénsia ida-ne’e liuhusi sosializasaun ne’ebé hala’o iha meiadu fulan-ne’e iha-ne’ebé konsideradu bee nu’udár nesesidade bázika liuliu komunidade iha área urbana Baukau Vila ne’ebé sei menus asesu bee-moos.
“Liuhusi konsulta públika, komunidade responde pozitivu tebes. Komunidade deklara lalika tan halo konsulta maibé direta implementa tanba konsideradu kle’ur ona,” Adriana informa ba TATOLI iha ninia kna’ar fatin, Vila Nova, Kinta ne’e.
Adriana Belo konfesa projetu referidu responsabiliza husi nasionál liuhusi Ministériu Obra Públika no tuir informasaun foin iha faze aprovizionamentu ne’ebé tuir planu bainhira implementa sei utiliza bee-matan haat hanesan Uaisarake, Uailiabere no Uailiamata no Uailewa iha-ne’ebé kada bee-matan sei konstrui tanke rezervatóriu ho volume rihun ida-resin no bee referida sei konsume direta husi kanu.
Aleinde ne’e, bainhira projetu ne’e implementa sei responde ona komunidade nia halerik tanba atuál área urbana utiliza bee-matan ida Uailia ne’ebé konsideradu seidauk sufisiente.
“Projetu ne’e sei implementa ba área urbana inkluidu suku balun ne’ebé afetadu ba projetu ne’e,” Adriana Belo akresenta.
Antes ne’e, inísiu tinan-ne’e, Governu liuhusi reuniaun Konsellu Ministru delibera hodi autoriza despeza no abertura prosesu aprovizionamentu ba konstrusaun sistema abastesimentu bee-moos iha Baukau. Projetu estruturante ne’e ho objetivu atu garante fornesimentu bee ne’ebé regulár no seguru no apropriadu ba konsume umanu ba populasaun iha Baukau.
Projetu ne’e bazeia ba estudu tékniku ne’ebé molok ne’e hetan ona validasaun. Sei iha investimentu ida-ne’ebé prevee besik dolar amerikanu millaun 23,4, ho objetivu atu hadi’a kondisaun saúde públika no kualidade moris komunidade lokál sira-nian.
Entretantu, BTL, E.P. Baukau rejista kliente hamutuk 2.400-resin ho rendimentu trimestrál dahuluk tinan-ne’e hamutuk rihun $40-resin.
Jornalista: Natalino Belo
Editór: Xisto Freitas da Piedade
