VIKEKE, 28 Maiu 2026 (TATOLI)—Diretór Servisu Ministériu Agrikultura, Peska, Pekuária no Floresta (SMAPPF) Munisípiu Vikeke, Olívio Soares Freitas, informa akontesimentu udan boot foin lalais ne’e MAPPF Vikeke rejista natar ektare tolu iha Hiratokoro, área Alembata, Suku Babulu, Postu Uatulari, Munisípiu Vikeke, hetan estragu totál husi mota.
“Ita rejista natar agrikultór sira-nian mota estraga totál, kauza husi mota Alembata tun boot entaun lori fatuk no ai sira lori tama ba natar laran. Agrikultór sira kuda ona hare mak sai estragu tiha,” Olívio ba TATOLI iha Postu Vikeke Vila, Kinta ne’e.
Diretór SMAPPF Munisípiu Vikeke ne’e dehan, ba natar ektare tolu ne’ebé mota estraga, MAPPF sei apoiu fini ba agrikultór sira atu kuda filafali iha natar.
Aleinde ne’e, nia dehan, SMAPPF Munisípiu Vikeke mós rejista irrigasaun hetan estragu husi mota ne’e mak hanesan irrigasaun Dardau Vessorsu, Irragasaun Ketunua, Irrigasaun Belia no Haeoli.
“Ita tau ona planu hodi normaliza filafali atu fornese bee ba agrikultór sira-nia natar. Tan ne’e, iha semana ida-ne’e empreza fornese ona mina ba ami, entaun ita hahú halo normalizasaun ba irrigasaun sira-ne’ebé hetan estragu,” nia hato’o.
Entretantu, natar Dardau hamutuk ektare 340 rai taka kuaze metru 100, natar Haeoli ektare 38 mota sobu totál inték husi mota nian, natar Belia ektare 442 no natar Ketunua ektare 75 mota estragu totál irrigasaun parte inték nian nune’e labele fornese bee ba natar.
Jornalista: Vitorino Lopes da Costa
Editór: Xisto Freitas da Piedade
