Meza PN simu proposta 17 iha debate espesialidade Orsamentu Retifikativu
DILI, 29 Maiu 2026 (TATOLI) – Iha debate espesialidade ba proposta Orsamentu Retifikativu (OR), meza Parlamentu Nasionál (PN) simu ona proposta hamutuk 17.
Prezidente Parlamentu Nasionál, Maria Fernanda Lay, hateten, tuir giaun, sei halo diskusaun ba kada proposta no artigu sira. Proposta hirak ne’e balun halo aditamentu, eliminasaun, husu aumenta no redusaun ba orsamentu.
Proposta lei OR ne’e iha artigu hamutuk neen. Iha debate espesialidade ho metodolojia sei diskute espesifikamente kada artigu no alínea iha proposta lei ne’e. Bainhira termina diskusaun faze espesialidade, Parlamentu sei kontinua kedas ho votasaun finál globál.
Lembra katak, iha 28 Maiu 2026, Parlamentu Nasionál, liuhusi reuniaun plenária estraordinária, aprova proposta Orsamentu Retifikativu ho montante millaun $192 iha faze jeneralidade ho votu a favór 42, kontra 0 no abstensaun 23 husi FRETILIN no PLP.
Proposta OR ne’e Governu aprezenta ho karáter urjénsia, no Governu prevee medida hitu ne’ebé fó prioridade aas liu ba garante seguransa enerjétika no seguransa alimentár iha país, relasiona ho impaktu husi funu iha Médiu Oriente.
OR ne’e la dada husi Fundu Petrolíferu ne’ebé aprova tiha ona iha Orsamentu Jerál Estadu (OJE) 2026 nian, maibé Governu halo efisiénsia iha nia despeza interna.
Governu prevee montante ba medida proposta OR millaun $271, totál montante ba medida retifikativu ajustadu mak millaun $192. Ho alterasaun ida-ne’e, verba konsolidadu husi OJE 2026 hamutuk billaun $2,39.
Notísia relevante: Parlamentu aprova proposta Orsamentu Retifikafivu iha jeneralidade
Jornalista: Nelson de Sousa
Editora: Maria Auxiliadora
