OEKUSI, 29 Maiu 2026 (TATOLI) – Sub-Komisaun Reguladora Arte Marsiál (Sub-Kram) Rejiaun Administrativa Espesiál Oekusi Ambeno (RAEOA), serbisu hamutuk ho Polísia Nasionál Timor-Leste (PNTL), kinta horsehik hala’o diálogu komunitariu iha komunidade suku Costa sub-rejiaun Pante Makasar hodi hasa’e konsiénsia no prevene konflitu nune’e labele kria problema iha rai-ketan ne’e.
Notísia relevante:PNTL Oekusi ofisializa estatutu no rejimentu internu juventude bairru Numbei
Prezidente Sub-Kram Oekusi, Jeferino da Cruz Sa’u, esplika katak, atividade diálogu komunitáriu ne’e, orientasaun direta husi Ministériu Juventude Desportu Arte no Kultura (MJDAK), ho alvu partisipasaun maka juventude sira liliu organizasaun arte marsiál, autoridade lokál no lia na’in-sira.
Ho objetivu atu apela ba joven sira, liliu integra-aan iha organizasaun arte marsiál atu hatuun tendénsia problema iha sosiedade nia leet, maibé kontribui ba prosesu dezenvolvimentu.
“Ita haree Oekusi ne’e normál, kuaze ladun iha ona aktu konflitu no problema, tanba konsiénsia, entaun liuhusi diálogu ne’e, atu fanun nafatin, apela nafatin ba foinsae sira, hodi labele kria problema iha rai-enklave ne’e, tanba tempu agora luta ba moris di’ak, partisipasaun ba prosesu dezenvolvimentu mak importante,” nia ko’alia iha sede suku Costa, kinta ne’e.
Komisáriu Veteranu ne’e, haktuir diálogu komunitária hanesan konsiensializasaun ba komunidade sira, liliu ba foinsa’e sira, hodi hasa’e koñeismentu kona-ba saida maka sidadaun, saida maka estabilidade no saida maka dezenvolvimentu.
Maske nune’e, nia orgullu durante lidera sub-KRAM Oekusi kuaze tinan-15 ona, juventude sira iha Oekusi, kuda metin lema (motto) Atoni-oan nian, katak unidade, asaun, progresu, hamutuk serbisu hodi dezenvolve Timor-Leste.
“Ida-ne’e hatudu katak, ita serbisu hamutuk la’ós organizasaun ida de’it maibé husi Governu, husi autoridade RAEOA no parte sosiedade autoridade komunitáriu, PNTL inklui komunidade, ita serbisu hamutuk maka ita fó valór ohin loron katak, problema arte-marsiál iha Oekusi no eskala mihis,” nia fó-sai.
Tanba ne’e, nia apela nafatin ba Grupu Arte Marsiál sira iha RAEOA, kontinua promove dame, no estabilidade.
Notísia relevante:Suku Naimeko ho Bobokase iha Oekusi implementa ‘tara-bandu hakribi violénsia’
Iha biban ne’e, Xefe Suku Costa, Fransisco Colo, konsidera diálogu ne’e, importante tanba suku Costa nu’udar sentrál ba suku 20 iha Oekusi tanba lokaliza iha vila kedas.
“Ita hotu hatene, suku 20 mai konsentra iha suku Costa no hela iha ne’e, inklui maluk sira husi rai-boot, entaun diálogu ne’e pas, atu mai esplika mai iha suku, liliu bairru sira mós ohin partisipa másimu, tanba durante ne’e ita observa, iha konflitu duni maibé ho volume k’ik, entaun atu prevene ida-ne’e labele akontese sai boot, ita tenke hahú ona, atu hasa’e konsiénsia públiku, liliu alin joven sira, tanba agora modernu, ema hotu iha direitu tuir organizasaun oioin, maibé importante labele halo barullu ba koflitu iha ssoiedade nia leet,” nia hateten.
Notísia relevante:KRAM Oé-Cusse bandu arte-marsiál uza atributu organizasaun partisipa eleisaun suku
Entretantu, tuir dadus neʼebé sub-KRAM Oekusi rejista iha 2024, organizasaun arte marsiál hitu (7) maka eziste iha Oekusi ho totál membru hamutuk 1.800-resin, komposta hosi Organizasaun Persaudaraan Setia Hati Terate (PSHT), organizasaun Ikatan Kera Sakti (IKS), organizasaun Kmanek Oan Rai-klaran (KORKA), organizasaun Perisai Diri (PD), THS-THM, Karatedo, Boxin, no Tae-kwondo
Jornalista: Abílio Elo Nini
Editór: Rafael Ximenes de A. Belo
