DILI, 29 Maiu 2026 (TATOLI) – Parlamentu Nasionál iha diskusaun faze espesialidade loron dahuluk aprova Orsamentu Retifikativu (OR) ba liña ministériu hamutuk 12.
Ministériu sira ne’e Gabinte Vise-Primeiru-Ministru no Ministru Koordenadór ba Asuntu Sosiál $966.707, Prezidénsia Konsellu Ministru $7.413.516, Sekretária Estadu ba Igualidade Jéneru no Inkluzaun $1.337.196.
Ministériu Koordenadór ba Asuntu Ekonómiku $8.855.253, Ministériu Koordeandór ba Asuntu Sosiál $986.0543, Sekretária Estadu Formasaun Profisionál no Empregu $9.738.567.
Sekretária Estadu Kooperativa $3.585.676, Dotasaun Jerál Estadu $389126,.817, Ministériu Negósiu Estranjeiru no Kooperasaun $36.120567, Ministériu Justisa $14.061.155, Ministériu Administrasaun Estatál $21.796.484 no Ministériu Saúde $76.590.614.
Sekretária Meza Parlamentu, Virgína Ana Belo, hateten ministériu hirak ne’e sofre alterasaun iha OR husi Orsamentu Jerál Estadu (OJE) 2026 orjinál ne’ebé antes ne’e aprova.
Deputadu Luís Roberto husi bankada Kmanek Haburas Unidade Nasionál Timoroan (KHUNTO) husu justifikasaun Governu nian iha OR ne’ebé ministériu lubun hetan korte orsamentu barak no bele fó impaktu ba programa no atividade ne’ebé trasa ona.
Ministra Finansa, Santina Cardoso, hateten OR ne’e Governu la halo levantamentu ba Fundu Petrolíferu ne’ebé aprova tiha ona iha Orsamentu Jerál Estadu (OJE) 2026 nian, maibé oinsá Governu halo efisiénsia iha nia despeza interna.
Hodi prevee medida adisionál hitu fó prioridade aas ba seguransa enerjétika no seguransa alimentár iha país hodi responde ba impaktu husi funu iha Médiu Orienta.
Ministériu Finansa kontinua akompaña liña ministériu hotu ho korte ne’e no bainhira iha nesesidade ruma bele responde liuhusi verba alokasaun orsamentu iha dotasaun Todo Governu nian.
Tuir livru orsamentál, iha ministériu no entidade públika ho autoridade munisipál hamutuk 83 mak sofre alterasaun iha OR ho montante hamutuk millaun $5.9, liuliu iha verba alokasaun bens no serbisu, transferénsia públika no kapitál menór.
Livru orsamentá ne’e dehan realokasaun ba redusaun diresionada husi item iha ministériu lubun, prinsipalmente iha verba no serbisu tanba ho ezekusaun ki’ik ou prioridade imediata ki’ik hanesan viajen, catering no loroloron.
Notísia relevante: Meza PN simu proposta 17 iha debate espesialidade Orsamentu Retifikativu
Jornalista: Nelson de Sousa
Editora: Maria Auxiliadora
