BOBONARU, 04 Juñu 2026 (TATOLI) – Empreza Funan Buras, hamutuk Autoridade lokál, estensionista suku, Guarda Floresta no komunidade sira,k inta ne’e kuda ai-fuan Saburaka hamutuk hun 143 iha área reflorestasaun Ai-aras Knu’a, aldeia Solesu, suku Soilesu, Postu Administrativu Bobonaru, ho objetivu atu suporta reflorestasaun, dezenvolvimentu turizmu no hasa’e ekonomia komunidade lokál.
Xefe Suku Soilesu, Marito Victor da Costa, informa inisiativa ne’e mai husi Empreza Funan Buras, ne’ebé lidera husi ema Soilesu nian rasik. Nia hatama pedidu ba Ministériu Agrikultura, Pekuária, Peskas no Floresta (MAPPF) atu hetan apoiu ba programa kuda ai saburaka iha área reflorestasaun.
Notísia relevante: Autoridade Bobonaru lansa Programa Merenda Eskolár tinan letivu 2026
“Hanesan autoridade komunitária, ami agradese tebes ba inisiativa ida-ne’e. Ida-ne’e mak primeira vez emprezáriu ida husi Soilesu rasik hanoin atu investe ba sustentabilidade no dezenvolvimentu komunidade iha tempu naruk,” Marito informa ba TATOLI.
Tuir nia, investimentu ne’e la’ós de’it atu dezenvolve setór agrikultura, maibé mós atu suporta poténsia turizmu iha área Bee-Tudak Sibi, ne’ebé sai hanesan fatin atrativu ba vizitante sira.
Nia esplika katak iha futuru, vizitante sira ne’ebé mai vizita Bee-Tudak Sibi bele konsumu ai-fuan saburaka husi área ne’e rasik, nune’e la presiza lori ai-fuan husi munisípiu seluk.
Xefe suku Marito subliña, emprezáriu ne’ebé lidera programa ne’e hateten katak nia objetivu prinsipál mak atu kria benefísiu ba komunidade, liuliu família sira iha aldeia ne’ebé partisipa iha prosesu kuda no kuida saburaka ne’e.
“Nia investimentu ida-ne’e la’ós atu buka lukru ba kompañia de’it, maibé atu fó benefísiu direta ba komunidade. Bainhira ai-fuan sira ne’e fa’an, ninia rezultadu ne’e la’os ba fali kompaña, maibé sei fila ba komunidade atu ajuda sustenta ekonomia família sira,” nia apresia.
Programa ne’e komunidade espera bele kontribui ba konservasaun ambientál, hasa’e rendimentu komunidade no dezenvolve poténsia turizmu iha suku Soilesu iha futuru no kontribui ba konservasaun bee, hadi’a klima lokál no aumenta beleza ambiental iha área referida.
Notísia relevante: Governu enkoraja setór privadu kontinua dezenvolve negósiu rai-laran
Jornalista: Sérgio da Cruz
Editór: Evaristo Soares Martins
