DILI, 05 Juñu 2026 (TATOLI) – Ekipa konjunta husi Ministériu Obras Públika (MOP) no Sekretaria Estadu ba Asuntu Toponímia no Organizasaun Urbana (SEATOU), ohin, halo despeju administrativu ba uma-kain 30-resin iha área Delta Elemloi, Dili, atu fasilita projetu alargamentu estrada entre Timor Plaza no Manleuana.
Sekretáriu Estadu ba Asuntu Toponímia no Organizasaun Urbana, Germano Santa Brites Dias, hateten medida ne’e presiza ona atu implementa tanba autoridade sira fó ona avizu ba proprietáriu sira atu hamamuk fatin, maibé balu seidauk kumpre orientasaun ne’ebé fó.
Nia dehan desde tinan 2024, SEATOU fó ona avizu ba proprietáriu “uma-kain hamutuk 33 ka 34 atu buka fatin.”
Germano fó hanoin hikas katak iha fulan rua liubá ekipa konjunta mós fó avizu fali atu sira bele sobu rasik sira-nia fatin “maibe balun kupera no balun lakohi.”
“Entaun to’o ona tempu, ohin ita mai sobu hodi halo dezenvolvimentu ba alargamentu estrada,” Germano ba jornalista sira iha Delta Elemloi, sexta ne’e.
Nia esplika katak maioria uma afetadu sira lokaliza no okupa área drenajen nian, iha ne’ebé durante tempu udan bele impede bee suli no kontribui ba inundasaun. Ho razaun ne’e, Governu presiza hamauk área referida atu hadi’a sistema drenajen no fasilita movimentasaun tráfiku.
Iha fatin hanesan, reprezentante tékniku MOP, Samuel Dani Soares, hateten katak maioria uma ne’ebé hetan despeju administrativu fó aluga ba ema seluk, inklui emprezáriu sira ne’ebé hala’o negósiu hanesan restaurante, fotokópia, ofisina mekánika (bengkel), loja no atividade komersiál seluk.
Nia dehan alén alargamentu ba estrada, iha mós planu atu reorganiza Rotunda Elemloi ho instalasaun sistema semáforu atu reduz engarrafamentu no hadi’a fluxu transporte.
Samuel akressenta katak MOP halo ona levantamentu no verifikasaun dadus ba proprietáriu uma-kain hotu ne’ebé afetadu. Tuir nia, maioria proprietáriu sira kolabora ho autoridade sira durante prosesu ne’e.
Nia hatoo katak kona-ba indemnizasaun, dokumentu hotu tama ona iha baze dadus. “Agora prosesu administrativu lao hela, no ami espera katak iha semana rua nia laraln MoP bele konklui ona pagamentu,” nia konklui.
Jornalista: Camilio de Sousa
Editór: Filomeno Martins
