VIKEKE, 07 Juñu 2026 (TATOLI)-Federasaun Voleiból Timor-Leste (FVTL), liuhusi Asosiasaun Voleiból, realiza Liga Voleibol Divizaun Datoluk ba tasa Ministériu Juventude, Desportu, Arte no Kultura (MJDAK) munisípiu Vikeke.
Vise-Prezidente FVTL Nasionál, Afonso Amaral Almeida, hateten programa liga ne’e nu’udar rezultadu parseria entre MJDAK no FVTL atu dezenvolve modalidade voleibós iha rai-laran tuir prosedimentu no natureza kompetisaun nian.
“Iha tinan 2024, ita hahú liga divizaun daruak no dahuluk. Diskusaun lubuk ida ho ministru, ita haree prosedimentu la’o tuir estatutu liga nian. Tuir estatutu, kompetisaun tenke hahú husi liga divizasaun datoluk, implementa iha munisípiu hodi haree ita-nia jogadór sira ne’ebé ponténsia. Tan ne’e, iha 2026 ita-nia liga liuhusi divizasaun datoluk iha kada munisípiu sira inklui Vikeke”, Afonso Amaral Almeida dehan ba jonalista sira, iha postu Vikeke Vila, ohin.
Nia esplika katak hateten husi divizasaun datoluk sei ajuda atu identifika talentu sira iha munisípiu.
Afonso hateten katak realizasaun taxa MJDAK ne’e ho objetivu mak atu buka denzenvolve atleta feto no mane sira ne’ebé iha poténsia aas atu prepara Timor-Leste ba kompetisaun rejionál no internasionál, liuliu depoizde nasaun tama ona ba membru ASEAN.
Iha fatin hanesan, Reprezentante MJDAK munisípiu Vikeke, Alfredo Claver, husu ba atleta sira atu la lakon esperansa bainhira la manán kompetisaun ne’e, no kontinua prepara-an ba oportunidade seluk iha futuru.
“Husu ba jogadór sira atu hatudu talentu jogu ho di’ak no labele hamosu problema. Nune’e mós ba arbitrajen sira tenke onestu labele liuhusi klube balun hodi hamosu problema no fó atensaun jogu iha kampu laran”, nia dehan.
Prezidente Autoridade Munisípiu Vikeke, Francisco Gonzaga Soares, enkoraja jogadór sira atu hatudu kapasidade, responsabilidade hanesan ekipa klube no tenke kria unidade ekipa hodi atinje rezultadu jogu iha kompetisaun ida-ne’e.
“Nune’e manán jogu iha Vikeke, bele manán tan iha rejionál no nasionál. Tan ne’e, tenke hatudu jogu di’ak ne’ebé realiza iha munisípiu Vikeke”, nia akrexenta.
Liga Voleiból Divizaun Datoluk ne’e iha klube hamutuk 12, kompostu husi klubu mane hitu no feto lima. Jogu referidu sei remata iha loron 19 fulan-Juñu 2026.
Jornalista: Vitorino Lopes da Costa
Editora: Maria Auxiliadora
