DILI, 08 Juñu 2026 (TATOLI)—Diretór Servisu Asisténsia Klíniku iha Hospitál Nasionál Guido Valadares (HNGV), Eligío A. de Araújo Soares, informa ekipa médiku sirurjia plástiku (Plastic Surgeon) husi Austrália halo operasaun ba pasiente ibun-sakat no fitar husi ahi han ema-nia isin, iha Hospitál Nasionál Guido Valadares hamutuk na’in-29.
Relasiona ho vizita médiku espesialista sira husi sirurjia plástiku nian ne’ebé mak kada tinan mai iha Hospitál Nasionál Guido Valadares, iha servisu hamutuk ho parseiru Internasionál ne’ebé liga ba pasiente ibun-sakat ka ahi han isin sira-ne’e.
“Sira mai fó konsulta hodi halo indentifka no halo operasaun ba ba pasiente timoroan sira-ne’ebé ibun-sakat, fitar sira husi ahi han isin, bee-manas huas ho fitar sira-ne’ebé mak dada an ne’e, atu repara fila-fali fitar sira-ne’e,” Eligío A. de Araújo Soares hateten ba jornalista sira iha nia kna’ar fatin, ohin.
Nia hateten, horisehik médiku espesialista sira fó ona konsulta iha sala OPD Hospitál Nasionál Guido Valadares no idetifika kazu totál hamutuk 65.
“Husi númeru ne’e sira-ne’ebé mak tama iha operasaun nian totál 29, ne’ebé ohin komesa ona halo operasaun. Operasaun ne’e fazeadamente, tanba ida-ne’e halo durante semana ida hahú ohin to’o sesta mak sira foin ramata,” nia dehan.
Nia relata, médiku espesilista sira-ne’e halo mós kontrola ba kazu sira-ne’ebé mak iha tinan kotuk sira mai halo ona operasaun ba pasiente sira.
Nia dehan, médiku espesialista sira-ne’e mai hamutuk na’in-lima (5), ho objetivu atu halo operasaun ba pasiente sira.
“Na’in ida ba iha sirurjia, na’in-rua (2) ba iha anastesia no na’in-rua ba iha speech ka ko’alia nian. Maibé iha programa ibun entaun sira mós presiza treina labarik sira atu bele ko’alia hafoin sira halo operasaun ramata,” nia dehan.
Nia subliña, sira halo konsulta ba pasiente sira hamutuk na’in-65 maibé na’in-29 mak prienxe kritériu, tanba depende ba kritériu ne’ebé mak iha hanesan ba labarik fulan tolu nian bele halo ona operasaun, maibé tama iha kompleksu mak nia operasaun ne’e bele ba fali fulan sia (9) ba leten.
“Sira-ne’ebé mak uluk mai ona dalaruma mai ho idade seidauk to’o sira-ne’e sei fó prioridade ba operasaun. Agora daudaun, sira mai ne’e ninia kritériu to’o ona no balun ne’ebé kritériu seidauk to’o, entaun hein fila-fali iha tinan oin mak sira bele halo fali operasaun no depende ninia tipu operasaun ne’e,” nia informa.
Karik pasiente sira ne’ebé mak menus husi fulan tolu sei operasaun iha tinan oin, maibé depende mós ba ninia komplikasaun sira durante operasaun liuliu liga ho anastesia nian.
Pasiente sira maioria husi Munisípiu Dili no na’in-ida ka rua mak halo traferénsia husi ospitál referál sira iha munisípiu.
Jornalista : Felicidade Ximenes
Editór : Cancio Ximenes
