BOBONARU, 08 Juñu 2026 (TATOLI) – Projetu estrada rurál tinan 2026 ho totál distánsia kilómetru 18,45 iha Munisípiu Bobonaru kompañia sira daudaun ne’e hahú implementa ona servisu fíziku.
Koordenadór Infraestrutura destakadu Ministériu Obras Públika, Munisípiu Bobonaru, Fernando de Fátima, konfirma estrada rurál ne’e hamutuk pakote ualu implementa Projetu FRC (Fiber Reinforced Concrete) iha pakote ida iha Kailaku, projetu estrada rurál pakote tolu iha Balibó no postu Bobonaru iha pakote haat.
Notísia relevante: Marsu, MOP implementa projetu reabilitasaun estrada rurál kilómetru 16 iha Bobonaru
“Pakote ualu ne’e agora ita-nia kompañia manán-na’in sira implementa ona, balu komesa ke’e ona bee-dalan sira ne’e, hamoos, sira-nia kontratu servisu tinan ida hahú fulan abríl tinan ne’e to’o abríl tinan oin,” nia informa ba Tatoli, iha kna’ar-fatin, segunda ne’e.
Iha fatin seluk, Xefe suku Soilesu, Marito Pereira Victor, agradese ba governu, ekipa tékniku, no parseiru sira ne’ebé fó apoiu ba realizasaun projetu ida-ne’e tanba liu husi obra ne’e bele responde ona povu nia halerik no hakonu povu nia esperansa ba ukun rasik-an.
“Komunidade hotu-hotu sente kontente ne’e sai hanesan oportunidade boot ida ba komunidade atu hetan asesu transporte ne’ebé di’akliu iha tempu udan, estrada ne’e sei fasilita movimentu ema no sasán, hasa’e atividade ekonomia lokál, no hafasil asesu ba servisu públiku hanesan edukasaun, saúde no merkadu,” nia dehan.
Autoridade Komunitaria ne’e husu ba komunidade atu servisu hamutuk, mantein seguransa durante konstrusaun no tau matan ba kualidade servisu atu rezultadu ne’ebé hetan bele dura to tempu naruk no fó benefísiu ba gerasaun sira tuir mai.
“Projetu estrada rurál ida-ne’e mak meiu importante ida atu liga komunidade sira, hamenus difikuldade transporte no lori dezenvolvimentu mai ita-nia suku, tan ne’e, ita hotu tenke sente responsabilidade atu apoia no rai-di’ak infraestrutura ne’ebe la’o iha suku,” nia hakotu.
Projetu sira ne’e mak reabilitasaun estrada Sibuni bá Mapeo-op ho kustu másimu $520.449,94, estrada rurál Sibuni $649.275,06, Leo-Lima Faturui pakote I $404.269,90, Leolima Faturui pakote II $371.025,96, Leo-Lima Faturui pakote II $339.030,44.
Nune’e mos reabilitasaun Plum Concrete Bobonaru Tuluata $259.151.89, reabilitasaun estrada rurál Malilait Taimea $453.143,66, no Projetu FRC Scale-Up Rurál Road Kolejiu Manapa $649.275,06 totál orsamentu pakote ualu ne’e ho orsamentu hamutuk $3,193,827.47.
Notísia relevante: Komunidade husu MOP reabilita ponte-estrada rurál iha Bobonaru
Jornalista: Sergio da Cruz
Editór: Evaristo Soares Martins
