BOBONARU, 09 Juñu 2026 (TATOLI)-Kondisaun infraestrutura Ensinu Pré-Eskolár (EPE) Gumer, suku Lourba, postu administrativu Bobonaru, munisípiu Bobonaru, la seguru ba estudante no manorin sira atu hala’o atividade ensinu no aprendizajen tanba zinku, ai no parede aat no nakfera hotu, ne’ebé kauzahusi dezastre naturál.
Manorin Fransisca de Jesus Godinho husu ba Ministériu Edukasaun (ME) atu tau prioridade iha orsamentu tinan 2027, tanba kondisaun infraestrutura atuál grave. Ho problema ida-ne’e difikulta mós prosesu ensinu no aprendizajen iha tempu udan no anin-boot.
Notísia relevante: Kondisaun EBF no EP Taimea la seguru ba estudante sira
“Tempu udan ho anin, rai-nakdoko, ne’e ita ta’uk dezastre akontese, tanba uma ne’e aat loos ona. Ba ami la seguru, depois fatin ne’e ida de’it mak ami fahe ba sala rua, ne’ebé ami hakarak husu ba Governu atu tau-matan ba fatin ida-ne’e atu ami mós bele hanorin ho di’ak ho kontente. Kondisaun hanesan ne’e dalabarak estudante la mai, balun inan-aman ta’uk atu haruka nia-oan mai eskola”, nia informa ba Tatoli, iha Gumer, tersa ne’e.
Koordenadora EPE Gumer, Maria de Jesus Pereira, relata katak problema ne’e iha tinan 2019, 2023 no 2025, relata ona ba Diresaun Servisu Munisipál Edukasaun Bobonaru, maibé to’o agora laiha rezultadu husu Ministériu Edukasaun.
“Sira haruka ami halo pedidu, ami hasai foto kondisaun aat sira ne’e, realidade to’o agora ami la rona ninia rezultadu”, nia dehan
Pré-Eskolár ne’e harii iha tinan 2008 husi ONG World Vision no transforma ba eskola públika iha tinan 2010.
Tuir dadus tinan letivu 202,6 EPE Gumer akumula estudante hamutuk 65 fahe ba klase A na’in 30 no B 35.
Notisía relevante: ME no Embaixada Japaun hametin kooperasaun ba dezenvolvimentu edukasaun iha Timor-Leste
Jornalista: Sergio da Cruz
Editora: Maria Auxiliadora
