DILI, 10 Juñu 2026 (TATOLI)—Prezidente Repúblika mantein iha nia pozisaun hodi kontra inisiativa Parlamentu Nasionál nian ne’ebé foti inisiativa hodi halo altersaun ba kódigu penál atu envolve lei kriminalizasaun difamasaun.
Notísia Relevante: AJTL Kontra Ezbosu Lei Kriminaliza Difamasaun
Xefe Eztadu ne’e hateten, bainhira Parlamentu Nasionál obriga-an lori lei ne’e ba, mak nia rasik sei veta no la halo promulgasaun.
“Lalika lakon tempu ko’alia kona-ba projetu-lei kriminalizasaun difamasaun, Parlamentu sira lalika lakon tempu, ita husi Timor-Leste liberade 100%,” Prezidente Ramos-Horta hateten ba jornalista sira bainhira partisipa iha serimónia Boas-Vindas ba Funsionáriu foun 2026 iha Tsuneishi Timor Shipbuilding Unipessoal, Lda, iha Sala Konferénsia, Hotel Timor, ohin.
Nia afirma, nusa preokupa ho projetu-lei kriminalizasaun difamasaun, di’ak-liu haree tau matan ba aselera investimentu projetu sira kria empregu ba povu.
“Lalika preokupa fali ho projetu lei kriminalizasaun difamasaun, tanba defamasaun ne’e la’ós mai de’it husi mídia, mai husi polítiku sira ko’alia tun-sa’e iha Parlamentu Nasionál,” nia dehan.
Nia esplika, entaun polítiku sira halo akuzasaun oioin inklui kontra Primeiru-Ministru, Prezidente Repúblika ne’e difamasaun oioin maibé sira iha umanidade.
“Agora jornalista oan sira hakerek buat ruma ne’e labele iha imunidade, di’ak-liu lalika preokupa ho ida-ne’e. Ita halo Timor nafatin liberdade imprensa 100%. Tanba ho mídia sosiál atuál iha mundu ne’e atu halo sees oinsá loos. Ne’eduni, ha’u hateten lalika lakon tempu ho projetu-lei kriminalizasaun defamasaun,” nia afirma.
Tanba ne’e, nia husu ba Parlamentu Nasioná atu konsentra ba ekonómia no konsentra ba lei ne’ebé atu fasilita investimentu.
Nia reforsa, ema barak iha mundu admira ba Timor-Leste nia liberdade, demokrásia di’ak no la monu hanesan rai osidentál balun.
“Se Parlamentu Nasionál avansa projetu lei kriminalizasaun difamasaun ne’e lori ona Palásiu Prezidensiál, ha’u sei haree, saida loos mak Parlamentu Nasionál haruka. Maibé, atu kriminaliza difamasaun husi mídia, ha’u la promulga,” nia hateten.
Nia hatutan, se hakarak kriminaliza difamasaun tenke hahú mós iha Parlamentu Nasionál. bainhira Parlamentu Nasionál rasik halo difamasaun ba malu no ema seluk.
“Halo difamasaun emvez ko’alia ba polítika ne’ebé di’ak ba rai, ko’alia tun-sa’e, halo akuzasaun ba malu ne’e mós difamasaun. Se sira hakarak ida-ne’e entaun ita sukat hotu-hotu didi’ak, maibé atu limita liberdade imprensa ha’u la simu,” nia dehan.
Notísia Relevante: Deputadu sira konsidera alterasaun Kódigu Penál hodi kriminaliza difamasaun la fó impaktu ba produtu jornalístiku
Jornalista : Hortêncio Sanchez
Editór : Cancio Ximenes
