DILI, 12 Juñu 2026 (TATOLI) – Ministru Asuntu Kombatente Libertasaun Nasionál, Gil da Costa Monteiro ‘Oan Soru’, ho ekipa hasoru malu ho Prezidente Repúblika (PR), José Ramos-Horta, hodi fó esplikasaun kona-ba prosesu verifikasaun no validasaun dadus Frente Esterna ba rekoñesimentu nu’udar kombatene libertasaun nasionál.
Oan Soru hateten katak enkontru ne’e realiza tuir konvite husi Prezidente Repúblika, ne’ebé iha preokupasaun relasiona ho verifikasaun no aprovasaun ka validasaun ba dadus sira rejistu husi Frente Esterna nian.
“Prezidente Repúblika konvida ami mai atu fó informasaun, tanba iha ema balun mós hatama reklamasaun, no kontestasaun. Prezidente Repúblika dúvida ho ida-ne’e, ne’ebé nia fó avizu ida liuhusi gabinete, ita fó esplikasaun loloos ba Prezidente Repúblika”, Gil da Costa hateten iha Palásiu Prezidensiál, Bairu Pité, Dili, ohin.
Ministru esplika katak husi aspetu importante iha avaliasaun kandidatu sira mak kritériu dedikasaun eskluziva, ne’ebé previstu iha Estatutu Kombatente Libertasaun Nasional.
“Prezidente Repúblika ohin husu atu ami mai informa loloos buat ne’ebé tuir lei, artigu hira mak iha ne’ebá mensióna no proteje sidadaun idaidak nia direitu hanesan kombatente ne’ebé bele hetan kondekorasaun, ne’ebé bele hetan diploma de onra no ida ne’ebé bele hetan direitu ba pensaun”, nia esplika.
Lembra katak, iha loron 02 Juñu 2026, kandidatu 118 pasa ona iha prosesu verifikasaun ba rekoñesimentu nu’udár Kombatente Libertasaun Nasionál, maibé lista ne’e seidauk definitiva no sei hein aprovasaun finál husi autoridade kompetente antes publika.
Kandidatu sira-ne’ebé pasa ona verifikasaun mai husi eskalaun oioin, inklui eskalaun ida to’o tolu.
Husi totál kandidatu na’in-118, iha na’in-14 mak ho tipu pensaun 20 a 24, na’in-11 ho tipu pensaun 15 a 19, kombatente na’in-15 konsideradu hanesan pensaun 8 a 14, kombatente na’in-31 konsideradu hanesan Prestasaun Pekuniária Únika, 4 a 7, ho menus tinan-tolu iha dedikasaun eskluziva no la konsideradu hanesan kombatente.
Notísia relevante: Kandidatu 118 pasa iha verifikasaun kombatente, hein aprovasaun finál sei publika lista
Jornalista: Arminda Fonseca
Editora: Maria Auxiliadora
