DILI, 18 Juñu 2026 (TATOLI) – Primeiru Ministru (PM), Kay Rala Xanana Gusmão, hasoru malu ho Prezidente Federasaun Rúsia, Vladimir Putin, iha ámbitu Simera Rúsia-ASEAN.
Rúsia realiza serimónia ofisiál benvindu no resepsaun Estadu hosi Prezidente Federasaun Rúsia, Vladimir Putin, iha Teatru Akadémiku Estadu Galiasgar Kamal Tatar atu fó onra bá xefe delegasaun sira inklui Primeiru-Ministru Timor-Leste nian, Kay Rala Xanana Gusmão ne’ebé partisipa iha Simeira Rúsia-ASEAN, kuarta (17/06).
Prezidente Rúsia, Vladimir Putin iha nia diskursu espera líder sira ASEAN nian sei aproveita ospitalidade hosi Povu Rusia nian.
“Ha’u hakarak simu dala-ida tán imi hotu iha Rúsia. Ita hasoru malu iha Kazan, sidang furak no antigu ida ne’ebé reflete diversidade kulturál no relijioza ita-nia rain nian, ninia patrimóniu istóriku no espirituál ne’ebé riku, no iha tempu hanesan, Ida-ne’e mak sidade boot ida ne’ebé modernu, dinámiku no haree ba li’ur. Ha’u fiar katak ita-boot sira hetan esperiénsia ospitalidade no laran manas jenuinu husi povu Rúsia no iha opurtunidade atu aprende kona-ba sira-nia tradisaun ne’ebé riku tebes,” Vladimir Putin hateten liuhusi nota imprensa ne’ebé TATOLI asesa husi Mídia GPM, kuarta ne’e.
Simeira ne’e hala’o hanesan parte ida hosi selebrasaun sira ne’ebé marka aniversáriu bá dala-35 hosi relasaun sira entre Rúsia ho Asosiasaun Nasaun sira Sudeste Aziátiku nian.
Ida-ne’e halibur ona líder sira, xefe governu sira, polítiku sira aas liu no ofisiál Governu nian sira hosi Estadu membru ASEAN 11.
Kompozisaun distintu hosi partisipante sira hatudu ho klaru kompromisu fahe hosi Rúsia no nasaun sira hosi Sudeste Aziátiku nian hodi hametin parseria, hasa’e bá nível foun ida, no habelar liután kooperasaun ne’ebé fó benefísiu ba malu iha polítika no seguransa, ekonomia, komérsiu, investimentu, no interkámbiu kulturál no umanitáriu sira.
Partisipasaun líder sira ASEAN nian iha Rúsia-ASEAN Summit 2026 mak hanesan Brunei Darusalam, Kamboja, Indonézia, Laos, Malázia, Miánmar, Filipina, Singapura, Tailándia, Timor-Leste no Vietname.
TATOLI
