DILI, 20 Juñu 2026 (TATOLI)–Ekipa Aitana FC obrigadu tenke fahe pontu ba malu iha jogu kontiuasaun Liga Futeból Timor-Leste (LFTL) Primeira Divizaun époka 2026 ne’ebé realiza iha Estádiu Munisipál Dili, Sábadu lorokraik ne’e.
Bainhira jogu hahú, ekipa rua lansa kedan kontra atake ba malu. Aitana iha oportunidade másimu liuhusi jogadór Altun Yasin, maibé la konsege fera defeza Marca.
Oportunidade barak Aitana hetan, iha minutu 15 Antoninho hetan oportunidade lansa suta ida ba guarda-rede Marca, maibé suta ne’e la kona iha alvu.
Marca ne’ebé lidera husi treinadór José Fonseca la nonok, lansa atake hasoru Aitana, maibé defeza Aitana ne’ebé lidera husi Mario Neves la fó fatin.
Notísia relevante : DIT hurlele Aitana ho rezultadu 2-1
Kontra-atake entre ekipa rua to’o minutu 45 termina laiha ida mam prodús golu no rezultadu mantein 0-0.
Iha minutu parte daruak, Marca halo mudansa ba nia lina klaran hodi lansa atake maka’as hasoru Aitana, maibé Aitana hatan ho kalam nune’e bola ba mai de’it iha liña klaran.
Avansadu Aitana kordena di’ak tebes ho sira nia jogadór médiu, maibé labele atu sobu Marca nia defeza ne’ebé metin hanesan morru berlin.
Ho forsa ne’ebé la diferensa ikus taka minutu jogu 90 laiha ekipa ida mak prodús golu rezultadu mantein 0-0. Husi rezultadu ne’e, ekipa rua tenke fahe pontu ida-ida ba malu.
Jogu ne’e lidera husi árbitru prinsipál, Cândido Manuel Belo, juíz liña Paulo da Costa, Peregrino dos Reis no árbitru rezerva Francisco Pereira.
Husi rezultadu ne’e lori ekipa rua foin akomula pontu rua iha tabela klasifikasaun provizóriu, iha jogu sira tuir mai tenke esforsu-an maka’as atu nune’e labele tama iha tabela degradasaun.
Jogadór Aitana: (4-3-3)
Samuel Noii, Rigeberd Lay, Robinho da Silva, Mario Neves, Denulson Romsumbre, Rui Soares, Zenidine Lopes, Altun Yasin, Jossin da Cunha, Antoninho, Jimmi Aronger.
Jogadór Marca: (4-4-2)
Tonito Fernandes, Marcio Oliveira, Natanel Barros, Nelson Castro, Joãozinho Amaral, Akanmidu Friday, Florindo Soares, Nyonis Estefanus, Gabriel Pires, Oibo Godspower, Celcio Santos.
Jornalista : Hortêncio Sanchez
Editora : Julia Chatarina
