DILI, 20 Juñu 2026 (TATOLI)–Jogadór avansadu Maroko, Ismael Sabari sai eroi bainhira marka golu ho tempu lais liu iha minutu 1 bainhira jogu hahú kontra adversáriu Eskósia grupu C Kopa Mundiál FIFA 2026 hodi rekolla pontu haat metin ba Maroko.
Jogu ba nasaun rua realiza iha Estádiu Gillette iha Foxborough, Massachusetts, Sábadu dadeer oras Timor-Leste nian.
Husi rezultadu ne’e, lori Maroko lidera provizóriu grupu C ho pontu haat, Eskósia mantein iha pozisaun daruak ho pontu tolu. Iha jogu tuir mai grupu C Brazíl sei kontra Haiti no ekipa rua hadau malu sé mak manán ba tuur iha pozisaun daruak no dahuluk. Atu avansa ba ronda 32, ekipa haat sei serbisu maka’as iha jogu ikus grupu nian hodi determina sé mak pontu boot liu mak avansa ba oin.
Bainhira jogu la’o lidera husi árbitru, Ilgiz Tantashev, husi nasaun Uzbekistaun. Fó orientasaun husi huu apitu dahuluk, Maroko halo kedas golu hafoin jogu akontese iha minutu 1, avansadu Sabari fura ona rede Eskósia hodi muda rezultadu ho lais liu ba 1-0.
Notísia relevante : Kopa Mundiál 2026: EUA hakat ba ronda 32 hafoin halakon Austrália 2-0
Golu ne’e mosu husi jogu preparasaun Maroko nian. Brahim Diaz, joga husi sorin-loos, ho matenek haruka pasajen diretu ida ba Saibari, ne’ebé maka hakat ba kaixa penalidade eskoses nian.
Saibari halakon armadilla offside no simu pasajen ho perfeitu. Ho suta ida-ne’ebé maka’as, Saibari suta ho susesu ba iha rede Eskósia, guarda-rede la antisipa ho di’ak bola tama liu laran.
Kontra-atake sai manas iha minutu 18, Maroko kria tan oportunidade perigozu ida, monu ba jogadór Achraf Hakimi. Maski nune’e, suta Hakimi nian hetan salva husi Guarda-Rede Eskoses.
Maroko kontinua ataka no fó presaun ba defeza Eskoses. Biar nune’e, Eskósia gasta sira-nia tempu barak liu iha defeza, konsentra iha sira-nia parte rasik no lansa kontra-atake lalais.
Estilu atake Maroko nian sai hanesan problema ba sira nia adversáriu, hodi halo susar ba Eskósia atu dezenvolve sira nia jogu.
Inversamente, kontra-atake barak Eskósia nian ladún fó ameasa ba baliza Maroko nian.
Laiha golu seluk ne’ebé maka marka to’o intervalu. Maroko lidera Eskósia 1-0 iha intervalu.
Iha inísiu husi parte daruak, Maroko mós sai ho atake no amesa rede Eskósia nian. Iha minutu 50, Saibari konsege halo konversaun kruzamentu ida. Maibé, Saibari nia suta desvia hosi defeza Eskoses ida nia ain, hodi halo bola desvia husi trave, hodi lori ba kantu.
Husi kantu Hakimi nian, Maroko iha tan oportunidade ida. Maski nune’e, Bilal El Khannous nia kabesa hetan blokeiu husi Guarda-Rede Eskoses.
Iha minutu 63, defeza marrokinu Issa Diop halo erru ida durante preparasaun hodi fó oportunidade ba Eskósia. Maibé, Ryan Christie nia suta liu tiha trave.
Iha minutu 80, jogadór Eskósia Scott McTominay monu iha kaixa penalti Maroko nian. Maibé, árbitru la fó prémiu hodi marka penalidade.
Hafoin, iha minutu 85, Eskósia lansa tan atake ida. Maibé, suta McTominay nian la’o dook husi baliza Maroko nian.
McTominay iha tan oportunidade minutu tolu liu tiha, maibé nia suta salva husi Guarda-Redes marrokinu.
Minutu sanulu ikus hosi jogu ne’e maka’as, ho ekipa rua troka atake. Maibé, laiha golu seluk ne’ebé akontese tan. Maroko manán 1-0 hasoru Eskósia, no ekipa rua ne’e iha nafatin oportunidade atu avansa ba ronda 32.
Eskósia (3-4-2-1):
Angus Gunn; Grant Hanley, Jack Hendry, Kieran Tierney; Nathan Patterson, Scott McTominay, Lewis Ferguson, Andy Robertson; John McGinn, Ryan Christie; Che Adams.
Treinadór: Steve Clarke
Maroko (4-2-3-1):
Yassine Bounou; Noussair Mazroui, Chadi Riad, Issa Diop, Achraf Hakimi; Ayyoub Bouaddi, Neil El Aynaoui; Bilal El Khannouss, Azzedine Ounahi, Brahim Diaz; Ismael Saibari.
Treinadór: Mohamed Ouahbi
Jornalista : Hortêncio Sanchez
Editora : Julia Chatarina
