OEKUSI, 24 Juñu 2026 (TATOLI) – Konsellu-Veteranu iha Rejiaun Administrativa Espesiál Oekusi Ambeno (RAEOA), sente laran triste tanba líder funu na’in-ida lakon ona husi povu Timor-Leste nia leet.
“Ami komesa horsehik sunu lilin iha edifísiu, ami hamutuk reza no laran triste, tanba ita-nia lideransa rezisténsia ida-ne’ebé uluk reziste iha ai-laran durante tinan-24 to’o ita ukun rasik-an, hamutuk nafatin ho ita, no ohin ba oin, ita-nia aman sei la lahamutuk ona ho ita, nia ba ona mundu seluk, nu’udar Konsellu-Veteranu Oekusi, sente triste, tanba ita-nia maun no ita-nia aman lutadór ida, nia idade sei bele hela atu hamutuk ho ita, maibé planu Maromak nian, hadomi liu nia,” Prezidente Konsellu-Veteranu Oekusi, António da Conçeição, ba jornalista sira iha Oekusi, ohin.
Notísia relevante:Ai-kameli “Lú Olo” nian: Memória moris ida-ne’ebé kontinua hamorin Oekusi
António da Conçeição, ho naran kódigu, ‘Mau Ki’ak Lifau’, konsidera Maktoban Francisco Guterres Lú Olo, nu’udar líder exemplár, tanba durante nia asumi kargu nu’udar Prezidente Repúblika to’o eventu demokrásia, nunka ko’alia aat hasoru nia adversáriu polítika iha palku polítika; kampañia.
Tanba ne’e, kombatente ne’e, konfirma, nu’udar sidadaun timorense ne’ebé sei moris, presiza hato’o orasaun ba Saudozu nia klamar, atu hetan moris di’ak ho dame iha lalehan.
“Ita ne’ebé moris, kontinua reza nafatin ba nia klamar, atu Maromak perdua nia salan sira, maibé ita hotu fiar katak, ita-nia aman sei moris haksolok iha Lalehan, tanba nia luta, nia dedikasaun ho sakrifísiu sira halo ona ba povu Timor-Leste, dezde 1975 to’o 1999 kontinua mai to’o hakotu nia vida iha 2026 ne’e, ita akompañia nia moris durante tinan barak bainhira iha tempu polítika, ita haree nia nunka trata ema seluk ka líder seluk, valór sira-ne’e maka ita tenke kaer metin nu’udar jerasaun foun,” nia fó hanoin.
Notísia relevante:Komunidade Musulmana presta omenajen ba Lú Olo
Prezidente Konsellu-Veteranu ne’e, informa, antes ne’e simu ona orientasaun husi nasionál, atu hasa’e bandeira meia-haste no reza, aleinde ne’e mós atu dezloka ba Dili hodi presta omenajén no partisipa iha seremónia funebre Saudozu nian nu’udar despedida momentu ikus ona.
Enkuantu, Saudozu Francisco Guterres ‘Lú Olo’ moris iha Osú Munisípiu Vikeke iha loron 07 Setembru 1954, no hakotu nia peregrinasaun iha mundu ne’e ho idade 71, iha Ospitál Prince Court iha Kuala Lumpur, Malazia, iha ne’ebé nia simu hela tratamentu médiku intensivu, iha loron 22 fulan Juñu 2026 ne’e.
Jornalista: Abílio Elo Nini
Editór: Rafael Ximenes de A. Belo
