OEKUSI, 24 Juñu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kuarta-ohin, informa katak, implementasaun Programa Tatoli Hakbesik, ne’ebé tuir planu sei realiza iha loron sexta 26 Juñu 2026 ne’e, ho oradór prinsipál Prezidente Repúblika, José Ramos Horta atu hala’o dialogu kona-ba Fraternidade Umana, adi’a hodi hein fali konfirmasaun data foun husi Prezidente Repúblika.
“Ami simu ona informasaun husi Gabinete Prezidente Repúblika, katak adi’a to’o konfirmasaun data foun fali, tanba ita-nia Prezidente Repúblika sei partisipa iha seremónia funebre Saudozu Francisco Guterres ‘Lú Olo, iha loron sexta 26 Juñu 2026 ne’e,” Prezidente Autoridade RAEOA ba jornalista sira ih Oekusi dehan, ohin.
Notísia relevante:Programa “Tatoli Hakbesik”, Autoridade RAEOA sei konvida bainaka husi NTT na’in-90
Autoridade RAEOA mós koordena ona ba bainaka sira husi Propinsía Nusa Tengaa Timur (NTT), hanesan Belu Atambua, Timur Tengah Utara no Kupang.
“Horsehik tersa-feira, konvite formál ba ita-nia belun viziñu sira iha NTT, ita-nia Diretór ida dezloka ba ona, reprezenta Autoridade, atu inform aba sira katak, programa ne’e retira maibé ho konfirmasaun ida katak, sei konfirma filafali data, tanba loloos implementa iha 26 Juñu 2026 ne’e, no 25 Juñu Prezidente Repúblika to’o Oekusi, ne’ebé la’ós kansela maibé adi’a de’it,” nia hateten.
Notísia relevante:Tatoli Hakbesik iha RAEOA sei destaka implementasaun Fraternidade Umana
Programa Tatoli hakbesik ba iha munisípiu, nu’udar programa prioridade husi mídia estatál TATOLI,I.P, neʼebé antes ne’e realiza ona iha Postu Administrativu Maubise, Munisípiu Ainro iha tinan-2025 ho oradór prinsipál maka Prezidente Repúblika, José Ramos Horta.
Entretantu, implementasaun Programa Tatoli Hakbesik iha RAEOA ne’e nia objetivu mak hametin konfiansa entre povu no Estadu, promove pás, diplomásia no defende direitu ema hotu. No, Rezultadu esperadu husi programa referidu iha RAEOA ne’e mak hametin relasaun Estadu ho povu, fó espasu atu kria konfiansa, solidariedade, no fraternidade umana, inklui valoriza diversidade kulturál no sosiál RAEΟΑ. Programa ne’e fó espasu atu fó apresiasaun ba kultura no identidade komunidade hanesan parte esensiál ba unidade nasionál.
Jornalista: Abílio Elo Nini
Editór: Rafael Ximenes de A. Belo
