BAUKAU, 25 Juñu 2026 (TATOLI)—Selebrasaun misa requiem ba Maktoban Eis Prezidente Repúblika, Francisco Guterres Lú Olo, nu’udár parte hasa’e orasaun hodi hanoin maktoban nia memória vida umana ne’ebé durante moris husik hela ba povu no nasaun.
Ko-Selebrante Misa Requiem, Pe. Evaristo Marçal, esplika ho notísia falesimentu Eis Prezidente Repúblika ne’e halo timoroan hotu iha tristeza laran tanba lakon osan-mean ida, eroi, onestu, prudente, mestre ne’ebé tane interese komún aas liu interese privadu, maski nune’e mate nu’udár dalan finál ne’ebé la fihir pesóal riku ka ki’ak, matenek ka beik tuir tempu ne’ebé diferente.
“Ita-nia saudozu nia mate husik hela memória umana nian, hanesan nia maluk sira seluk ne’ebé iha espíritu aten brani, sakrifísiu no pertense liuliu husik nia vida joven hodi luta ba autodeterminasaun nasaun no povu Timor-Leste nian,” Padre Evaristo hateten liuhusi omília iha Igreja Katedrál, Vila Antiga, Baukau, Kinta ne’e.
Relijiozu ne’e,relata pesóal Lú Olo nia mate husik hela legadu hanesan memória espirituál no umana liuliu durante tinan-24 hamutuk ho kombatente sira luta tanba hanoin povu no rai Timor-Leste.
Aleinde ne’e, tuir Padre, saudozu hamutuk ho natureza iha-ne’ebé antes lakon vida mosu fenomena iha saudozu nia moris fatin hanesan akontese rai nakadoko halo rai monu iha foho Builó, Postu Ossú.
Seluk, Padre Evaristo Marçal salienta Lú Olo nu’udár pesóal fiar na’in liuliu bainhira tempu serbisu mezmu todan maibé nunka haluha vida espirituál hanesan kada tinan hasa’e misa agradesimentu asaun grasa nian ba nia serbisu, vida no situasaun.
Iha fatin hanesan, Prezidente Autoridade Munisipál (PAM), Veneranda Eurico Lemos Martins, hateten selebrasaun misa requiem ba Maktoban Eis Prezidente Repúblika, Francisco Guterres Lú Olo nu’udár espasu ba komunidade Baukau atu partisipa hasa’e orasaun no últimu omenajen liuliu reflete ba saudozu ne’ebé konsideradu nu’udár eroi no líder umilde.
“Ita lakon eroi, la’ós de’it lakon aman, lutadór maibé ita hotu halo refresaun katak to’o ona idade 20-resin hanesan nasaun, saudozu nu’udár líder ne’ebé laran maus, di’ak, líder ne’ebé fó-an no dedika an hodi harii rai ida-ne’e metin nafatin no hasai povu husik ki’ak no mukit. Ida-ne’e hela ona istória ba ita idaidak,” Veneranda Lemos subliña.
Eis deputada ne’e hateten hafoin ramata misa, ekipa husi Autoridade Munisipál Baukau (AMB) sei reprezenta povu Baukau dezloka bá Dili lori ai-funan no lilin hodi fó ultimu omenajen antes saudozu haloot iha Jardin Eroi Metinaru, Sesta (26/06/2026).
Entretantu, selebrasaun misa requiem ba Saudozu Eis Prezidente Asembleia Konstituinte, Francisco Guterres Lu Olo partisipa husi Autoridade Munisipál Baukau, postu no suku, autoridade sivíl no militár, estudante inklui komunidade.
Jornalista: Natalino Belo
Editór: Xisto Freitas da Piedade
