DILI, 26 Juñu 2026 (TATOLI)—Madrugada foin hahú iha Antigu Prezidente Repúblika Timor-Leste, Francisco Guterres ‘Lú Olo’, nia rezidénsia iha Farol, Sesta ne’e, maibé uma ne’ebé maka sai hanesan fatin ema rihun ba rihun fó sira-nia omenajen ikus durante loron balun, nakonu ho silénsiu, orasaun, no matan-been bainhira prosisaun Funerál Estadu nian hahú.
Maski Kadaver sai bá Komité Sentrál FRETILIN (CCF) marka ona ba tuku 07:30 dadeer oras lokál, lutu sira kontinua to’o liutiha tuku 06:00 dadeer. Sira halo liña ho nonook hodi fó sira-nia omenajen ikus ba figura ne’ebé iha influénsia liu iha istória luta independénsia Timor-Leste nian.
Membru na’in-12 FALINTIL-Forsa Defeza Timor-Leste (F-FDTL) hamriik ho formasaun onra, lori sira-nia kilat. Enkuantu, Polísia Militár, Pesoál F-FDTL, no ofisiál sira seluk mós prepara hodi akompaña prosisaun funerál molok muda ba pontu omenajen ne’ebé dezignadu.
Notísia relevante : Mari Alkatiri presta omenajen ikus molok Lú Olo husik Rezidénsia Farol
Entretantu, iha resintu Rezidénsia Farol, ofisiál sira hamoos barraka nia sikun hotu-hotu ne’ebé sai hanesan fatin ba públiku atu hato’o sira-nia kondolénsia iha loron hirak liubá.
Ai-funan sira ne’ebé enfeita ona iha morru uma nian iha kalan, antes ne’e transporta ona bá Jardín Eroi iha Metinaru, enkuantu sira seluk lori bá Igreja Katedrál nu’udar parte ida husi preparasaun sira ba omenajen tuirmai.
Atmosfera sai emosionadu liután bainhira maizumenus tuku 06:30, Sekretáriu-Jerál FRETILIN, Mari Alkatiri to’o ho nia espoza iha Rezidénsia Farol. Sira tama neneik iha uma saudozu nian, hodi hamutuk ho ema sira ne’ebé iha formatura. Hafoin fó sira-nia omenajen, ofisiál sira hahú hasai ai-funan sira, lilin sira, panfletu sira, no oferta oioin ne’ebé restu atu tula iha kamiaun ida bá Igreja Katedrál. Preparasaun hotu-hotu hala’o bainhira hein karreta funeráriu F-FDTL nian, ne’ebé tula ona matebian iha loron balun antes ne’e husi Aeroportu Internasionál Prezidente Nicolau Lobato, Komoro.
Iha tuku 7:30 dadeer, Ekipa Konjunta kompostu husi membru PNTL no F-FDTL na’in-20 la’o neineik ba kaixaun. Hafoin fó onra militár, sira hahú foti kaixaun, ne’ebé uluk tau iha kontentór memoriál ida.
Iha liña oin, haree matebian nia kaben no oan na’in-haat sai uluk husi uma, akompaña mós husi maka Antigu Komandante F-FDTL, Lere Anan Timur no Mari Alkatiri.
Liutiha momentu balun, ekipa konjunta lori kaixaun sai husi Saudozu nia rezidénsia. Iha kaixaun nia leten rai bandeira tolu ne’ebé kaer signifikadu profundu iha Lú Olo nia moris: Bandeira Nasionál Timor-Leste, Bandeira FALINTIL, no Bandeira FRETILIN.
Bainhira de’it kaixaun ne’e liuhusi odamatan uma nian, matan-been ne’ebé koko atu tahan ikusmai nakfera. Husi uma laran bele rona tanis husi parente feto sira ne’ebé hakilar ‘Lú Olo’ beibeik, hodi akompaña sira-nia Maun Doben ba dala ikus.
Lere Anan Timur, hamriik iha kareta nia sorin, parese mós labele subar nia laran-susar. Nia hateke loos ba kaixaun, matan-been suli neineik iha nia oin.
Iha Kareta lori kadaver nia oin, kareta F-FDTL ida prontu ona atu lidera dalan, tuir fali ho motorizada Patrullamentu Espesiál Polísia Militár sia. Bainhira kadaver hahú la’o iha tuku 7:42 dadeer, ema hotu iha área ne’e hamriik ho atensaun hodi fó sira nia respeitu ikus.
Tuir dalan, estudante sira ne’ebé fila iha estrada ninin hodi haree prosisaun ho solene. Iha kadaver nia kotuk, karreta F-FDTL rua eskolta konvoi ne’ebé tuir mós karreta Mari Alkatiri nian, Lere Anan Timur nian, no maizumenus karreta neen seluk.
Iha kotuk, simpatizante no militante FRETILIN sanulu resin akompaña Lú Olo ho motor. Hatais roupa partidu nian no lori bandeira FRETILIN nian, ne’ebé namlele iha viajen tomak, sira akompaña líder ne’ebé iha dékada barak nia laran sai símbolu luta partidu no nasaun nian ba libertasaun.
Jornalista : Cidalia Fátima
Editora : Julia Chatarina
