BAUKAU, 02 Jullu 2026 (TATOLI)—Vítima ho inisiál CX lakon vida hafoin akontese asidente tráfegu iha área Kairavela, Suku Kampung Baru, Postu Administrativu Vemasse, Munisípiu Baukau.
Asidente tráfegu referidu akontese iha Kinta (02/07/026) maizumenus tuku 07:00 Otl, envolve vítima hamutuk ho ninia kolega insiál CDC nu’udár motorista diresaun Dili ba Vikeke bainhira utrapasa bus no ikus xoke kamioneta ne’ebé diresaun husi Laga ba Vemase hodi rezulta vítima CX lakon vida no Castro hetan kanek.
“Ami konfirma katak na’in-ida mate fatin, na’in ida mai iha-ne’e ami atende afeta iha nia ulun no parte liman ain sira-ne’e mak nakles hotu, más einjerál nia kondisaun di’ak,” Mediku Jeferino Amarál hateten iha Ospitál Rejionál Eduardo Ximenes (HoREX-sigla Portugeza) Vila Nova, Kinta ne’e.
Vítima na’in-rua utiliza motór marka beat ho xapa matríkula Y-5638 TL ne’ebé kondús husi Carlos ho diresaun husi Dili bá Vikeke maibé to’o área Kairavela mosu asidente ne’ebé vítima CX hakotu vida iha lokál asidente, enkuantu CDC tenke dezloka bá HoREX hodi halo tratamentu intensivu. Matebian CX transporta husi fatin asidente ho karru funeráriu bá sala mortuáriu HoREX Baukau, hafoin ne’e entrega ba família lori bá Uaimori, Vikeke.
Vítima CDC mezmu kanek iha parte matan fukun karuk no ain maibé jeralmente kondisaun di’ak no atúal kontinua tratamentu iha HoREX Baukau.
“Rezultadu ezaminasaun husi X-Ray raan sira-n’ee rezulta hetan fatura iha kbaas, tanba hetan pankada,” Jeferino tenik.
Iha fatin ketak, kondutór karreta kamioneta, Tiomótio Ximenes haktuir nia parte kondús karreta referida diresaun husi Postu Administrativu Laga atu bá Vemasse tula rai henek, maibé to’o iha área Kairavela hetan asidente referidu.
“Asidente ne’e ha’u la espera ha’u tesik bá foku loos estrada, ema katuas na’in-rua ka tolu mak hamriik iha estrada ninin derepente tarutu iha karreta okos ha’u hakfodak para karreta, motór iha tiha okos, na’in-ida mate fatin,” kondutór ne’e haktuir.
Entretantu, husi observasaun TATOLI iha terrenu nota Polísia Nasionál Timor-Leste (PNTL) Munisípiu Baukau liuhusi Seksaun Tránzitu rekolla ona informasaun inklui asegura evidénsia sira hanesan karreta bus no kamioneta inklui motór bá Komandu Baukau.
Enkuantu, kazu asidente tráfegu referidu ne’e kontinua prosesa iha PNTL Baukau tanba deskonfia akontese bainhira bus marka Putra Afasa ho motór mak xoke malu kauza ánsia atu ultrapasa nune’e motór xoke kamioneta hodi rezulta vítima na’in-rua iha asidente ne’e.
Jornalista: Natalino Belo
Editór: Xisto Freitas da Piedade
