DILI, 13 Jullu 2026 (TATOLI )—Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), Segunda ne’e, asegura tan sidadaun estranjeiru na’in-90 iha fatin rua la hanesan ho fraglante delitu halo atividade online scam.
DSIK hahú halo operasaun iha tuku 11:01, dezloka ba área Ulmera, Pontu Administrativu Bazartete, Munisípiu Likisá nune’e identifika katak iha sidadaun estranjeiru na’in-76 halo hela prátika online scam, nune’e PNTL konsege asegura no lori kedan mai edifísiu DSIK Komandu Jerál, Kaikoli hodi submete ba prosesu identifikasaun.
Aleinde ne’e, PNTL kontinua halo operasaun ba área Kampung Baru, ho nune’e deteta sidadaun estranjeiru na’in-14 iha rezidénsia ida halo hela atividade scam.
Ema na’in-76 ne’ebé detein iha Ulmera hanesan sidadaun Indonézia, enkuantu na’in-14 hanesan sidadaun Xina.
Diretór Servisu Investigasaun Kriminál, Superintendente Xefe Polísia João Belo dos Reis, hateten, operasaun ne’e tanba hetan informasaun husi servisu informasaun DSIK nian rasik, ne’ebé rekolla informasaun hotu husi parte líder komunitáriu iha área rua ne’e depois deteta katak iha duni poténsia ema balun komete fraude iha fatin ne’ebá.
“Entaun, ohin ita lansa ekipa rua iha área ida iha Kampung Baru, ida iha Ulmera besik Eskola Santo Inâcio Loiola. Husi fatin rua ne’e ita detein xineza hamutuk na’in-14 iha parte Kampung Baru ho fraglante delitu, sira halo hela sira-nia servisu scaming nian, ida seluk iha parte Ulmera iha kontentór boot ida-ne’ebé mak ema hamutuk 76, hanesan sidadaun Indonézia na’in-75 no sidadaun Xina ida hamutuk iha 76,” Komandante João Belo informa ba Jornalista sira liuhusi Konferénsia Impresa iha kuartel Jerál PNTL, Kaikoli.
Notísia relevante : Tribunál aplika medida tolu ba arguidu 27 iha kazu scam call center Metiaut
Nia esplika, depoizde halo identifiksaun fraglante delitu, DSIK halo kedan apreensaun ba sasán sira ne’ebé uza.
“Ha’u sei komunika ho maluk sira tanba sei iha hela identifikasaun sasán sira ne’ebé ita rekolla husi sira, hanesan evidénsia husi sira-nia aktu ne’ebé sira halo depois aban hanesan ne’e konferénsia dala-ida tan ba maluk sira hodi informa sasán saida-saida mak ami asegura, sidadaun sira husi nasaun ne’ebé,” nia tenik.
Diretór dehan, kazu ida-ne’e sei halo investigasaun kle’an, kona-ba sé de’it maka envolve.
“Tanba agora parte segredu justisa, ha’u labele ko’alia ba maluk sira,” nia katak.
Komandante João Belo rekoñese, kazu ne’e buras iha Timor, tanba ne’e presiza buka hatene no halo prevensaun.
“Ha’u lakohi fó sala ba ema ida, maibé operasaun ne’ebé ita halo ne’e hatudu katak ita iha frajilidade. Tanba ne’e mak ami nafatin serbisu hatudu ami-nia kompromisu nafatin, maibé asuntu ne’ebé interligadu iha ne’e. Mai hothotu tenke serbisu hamutuk para ita labele kria ita-nia nasaun sai hanesan ne,” nia hato’o.
Durante identifika ba suspeitu na’in-90 ne’e hetan akompañamentu husi sira-nia Defeza Advogadu Privadu Octávio Cardoso, Câncio Freitas no Advogadu timoroan ida tan.
Jornalista : Natalino Costa
Editora : Julia Chatarina
