DILI, 15 Jullu 2026 (TATOLI) – Prezidente Repúblika, José Ramos-Horta, apela ba servidór Estadu tomak, iha ámbitu Loron Nasionál Funsaun Públika ne’ebé monu iha 15 Jullu, atu serbí ema hotu lahó prejuízu, lidera ho integridade no atua ho kompaixaun hodi hakat ba dezenvolvimentu nasionál.
Tuir nota imprensa ne’ebé Tatoli asesu ohin, Xefe Estadu hato’o obrigadu no fó nia apresiasaun kle’an ba funsionáriu idaidak nia dedikasaun ne’ebé boot ba país ida-ne’e.
Ramos-Horta dehan dezde restaurasaun independénsia funsiáriu públiku sai nu’udar “motór ba Estadu”, mákina ne’ebé forte hodi fornese serbisu esensiál sira ba povu no lori nasaun ba oin.
“Imi-nia kompromisu mak sai hanesan pilár ne’ebé kontinua harii ba demokrasia no futuru”, nia afirma hodi destaka ba tema iha tinan ida-ne’e mak “Servisu Públiku Asesivel, Responsivu, Transparente, Justu, no Efetivu” ne’ebé sai hanesan apelu ida ba asaun.
Tuir nia, tema ida-ne’e dezafia ema idaidak atu reflete kle’an kona-ba kualidade no impaktu husi serbisu ne’ebé fornese, serbisu ne’ebé halo loroloron no impaktu ba sidadaun idaidak nia
“Ita kontinua hametin ita-nia instituisaun sira no alkansa dezenvolvimentu sustentavel. Mai ita serbí ho espíritu hanesan ne’ebé orienta ita-nia povu ultrapasa kapítulu sira ne’ebé nakukun liu iha ita-nia istória no ba naroman pás no liberdade nian”, Ramos-Horta hateten.
Nia apela ba funsionáriu sira atu hamutuk hanoin hikas katak dedikasaun ne’ebé hatudu iha loron ohin forma mundu aban-bainrua nian, ba oan sira, komunidade no nasaun.
Jornalista: Arminda Fonseca
Editora: Maria Auxiliadora
