DILI, 16 Jullu 2026 (TATOLI)-Primeiru-Ministru, Xanana Gusmão, informa katak nia parte la konkorda ho proposta Lei Kriminaliza Difamasaun ne’ebé antes ne’e Parlamentu Nasionál halo diskusaun.
“Ha’u la konkorda Lei Kriminaliza Difamasaun ne’e, tanba lei ne’e mosu, imi-nia mídia sosiál ne’e sei iha problema boot liu fali agora. Agora, temi dehan lalika, maibé ita provaka buat ida ho imi-nia mídia sosiál falsu sira ne’e, ida-ne’e, ein vez Tribunál bá haree kazu sira ne’ebé rihun ba rihun seidauk rezolve ne’e, bá haree fali buat ki’ik ida tolok malu sira ne’e”, Xanana hateten iha Palásiu Prezidensiál Bairu Pité, Dili, hafoin enkontru ho Prezidente Repúblika, José Ramos-Horta, ohin.
Xefe Governu ne’e esplika katak nia parte la konkorda ho lei ne’e, tanba oinsá mak atu define klaru ba difamasaun no insultu ne’e. “Ha’u la konkorda tanba difamasaun ne’e ita insulta oinsá, difama to’o iha ne’ebé? Ita rona iha Parlamentu bla…bla…más buat ne’e iha sosiedade laran ne’e imi kala difama malu ne’e mak hirus malu mak tau iha Tribunál”, nia dehan.
Lembra katak iha loron 13 Jullu 2026, Prezidente Parlamentu Nasionál, Maria Fernanda Lay, hasoru malu ho Prezidente Repúblika, José Ramos-Horta, hodi informa katak nia parte suspende diskusaun kona-ba proposta Lei Kriminaliza Difamasaun no Injúria iha faze jeneralidade, ne’ebé tuir planu atu debate iha plenária iha semana kotuk.
Nia parte suspende tanba to’o iha Parlamentu Nasionál haree katak pareser balun la haree ba kontestu lei rai-laran.
Notisía relevante: Prezidente Parlamentu suspende diskusaun Lei Kriminaliza Difamasaun
Jornalista: Arminda Fonseca
Editora: Maria Auxiliadora
