DILI, 16 Jullu 2026 (TATOLI)-Sekretáriu Estadu Komunikasaun Sosiál (SEKOMS), Expedito Loro Dias Ximenes, husu ba mídia estatál, Ajénsia Notisioza Timor-Leste Tatoli, Institutu Públiku no Rádiu Televizaun Timor-Leste, Empreza Públika (RTTL, E.P) atu halo kobertura másima ba atividade Dili Internasionál Maratona (DIM) 2026 no Konferénsia Internasionál Nobel ba Pás ne’ebé sei realiza iha fulan oin.
Komisaun organizadora ba eventu boot rua ne’ebé lidera husi Vise-Primeiru-Ministru no Ministru Koordenadór ba Asuntu Ekonómiku, Francisco Kalbuadi Lay, halo ona enkontru ho Prezidente Repúblika, José Ramos-Horta, hodi diskute preparativu ba eventu importante ne’e.
Tanba ne’e, ohin ekipa SEKOMS, mídia Palásiu Prezidénsia Repúblika, RTTL, E.P no Tatoli, I.P halo reuniaun koordenasaun atu inteira idaidak nia papél iha publikasaun informasaun sira.
“Ha’u fó hanesan orientasaun balun para sira bele atualiza ho programa ne’ebé iha tiha ona husi komisaun organizadora. Komesa ona disemina informasaun liuhusi kanál rua ne’e RTTL ho Tatoli”, Expedito hateten ba Tatoli, iha Palásiu Governu, ohin.
Nia informa katak, iha 30 Jullu, sei halo konferiénsia imprensa ba mídia hotu kona-ba eventu ne’e. Iha atividade lubun ba Semana Verde hahú husi loron 03 to’o 08 Agostu, iha programa komplementár sira ba sensibilizasaun kona-ba tema DIM 2026.
Ho programa jerál iha 04 Agostu hahú ho Horta Show, 05 Agostu kuda ai-oan no jantar iha Palásiu Nobre, 06 Agostu realiza semináriu, painél no diskusaun sira iha Palásiu Prezidénsia Repúblika no abertura ofisiál DIM Expo 2026 no prémiu Semana Verde.
Iha 07 Agostu, DIM expo 2026 no aprezentasaun kulturál no 08 Agostu hahú Dili Internasionál Maratona no ikus fahe mós prémiu ba manán-na’in.
Sekretáriu Estadu dehan iha loron 23 to’o 25 Agostu sei hala’o iha Sentru Konvensaun Dili Semináriu Internasionál Premiadu Nobel ba Pás.
Notísia relevante: http://Timor-Leste sei realiza eventu internasionál haat iha Agostu
Jornalista: Nelson de Sousa
Editora: Maria Auxiliadora
