DILI, 21 Jullu 2026 (TATOLI)—Ajénsia Dezenvolvimentu Nasionál (ADN) sei fó formasaun espesífiku kona-ba área teknikál nian ba ekipa tékniku na’in-56 husi Planu Integradu Dezenvolvimentu Munisipál (PIDM) no Programa Nasionál Dezenvolvimentu Suku (PNDS) iha kada munisípiu hodi aumenta kuñesimentu no garante kualidade projetu iha terrenu.
Diretór Ezekutivu Ajénsia Dezenvolvimentu Nasionál, Januário Maia Guterres, hateten sorumutu ne’e nia autorizasaun husi MPIE no ohin dader nia ba hasoru Primeiru-Ministru, Kay Rala Xanana Gusmão, hodi atualiza progresu projetu infraestrutura einjerál no inisiativa atu halo abertura ba formasaun tékniku ba ekipa tékniku PIDM no PNDS munisípiu 13 inklui RAEOA.
“Atu konfirma disponibilidade husi Xefe Governu nian hodi abertura ba treinamentu teknikál refere iha loron kinta (23/07) durante loron rua,” Diretór Ezekutivu ADN relata ba jornalista iha nia kna’ar fatin, ohin.
Objetivu husi formasaun ne’e atu promove koñesimentu tékniku sira iha programa PIDM no PNDS, tamba durante vizita Primeiru-Ministru nian ba munisípiu hotu nota katak projetu refere laiha kualidade.
“Entaun ami hakarak fahe esperiénsia ne’ebé mak iha liuliu entermus kualidade, no ita presiza fó formasaun ba ita-nia tékniku sira hodi oinsá halo kontrolasaun ba projetu ne’ebé estabelese husi programa PIDM no PNDS,” nia hateten.
Nia dehan, tamba implementasaun projetu PIDM no PNDS ne’e husi Ministériu Administrasaun Estatál entaun ADN la envolve iha ne’ebá, maibé sira nafatin hakarak hasa’e kapasidade tékniku sira-nian iha prosesu planeamentu, verifikasaun no inspesaun ba projetu ida.
Jornalista : Alexandra da Costa
Editór : Cancio Ximenes
