Eurico Neno husi Oekusi preokupa tanba seidauk simu direitu pensionista

OEKUSI, 22 Jullu 2026 (TATOLI) – Eis-Koordenadór Eskola Bázika Filiál (EBF) Neonpene, Eurico Neno, nu’udar funsionáriu reformadu, preokupa tanba nia direitu saláriu pensionista seidauk simu durante fulan tolu, hahú iha Maiu to’o Jullu 2026 ne’e.

Notísia relevante:KFP esklarese regra no prosedimentu reforma ba funsionáriu públiku iha RAEOA

Eurico Neno, hato’o nia preokupasaun ne’e, perante divulgasaun informasaun dadus no regra kona-ba prosedimentu reforma obrigatóriu no pedidu reforma por requeremento ba funsionáriu públiku sira iha Oekusi ne’ebé aprezenta husi Komisaun Funsaun Públika (KFP), foin lalais ne’e.

“Ha’u nu’udar funsionáriu edukasaun, ha’u-nia idade 65 tama ona reforma iha Abríl 2026 ne’e, reforma obrigatóriu automatikamente, tama loron 01 Maiu ha’u la serbisu ona to’o ohin loron, maibé ha’u preokupa tebes tanba ha’u-nia direitu hanesan reforma laiha, imajina fulan tolu tutuir malu, ha’u la simu, entaun ne’e afeta tebes ba ha’u-nia nesesidade família, favór funsaun públika, haree ha’u-nia problema ne’e,” nia hateten ho lian-triste iha salaun administrasaun Numbei.

Nia sente triste, tanba kestaun saúde, sei forte hela, atu kontinua nia profisaun nu’udar manorin, maibé tanba lei, katak idade 65 tenke reforma obrigratóriu.

“Karik ha’u-nia direitu laiha, di’akliu ha’u sei hanorin, tanba ha’u sei di’ak hela, sei forte hela atu hala’o serbisu ba Estadu, duke deskansa maibé laiha direitu saláriu, tinan 60-resin ha’u presta seerbisu ba Estadu, maibé bainhira tama reforma, tanba saida halo terus ha’u hanesan ne’e, ajuda Auoridade RAEOA ho Funsaun Públiku, konsidera ha’u-nia preokupasaun ne’e, terus tanba baibain simu osan, maka derepente la simu, ita-nia laran sente triste tebes,” nia husu.

Notísia relevante:KFP atribui sertifikadu apresiasaun ba funsionáriu reformadu na’in-49 iha Oekusi

Iha fatin hanesan, pensionista Eurico da Costa Bobo mós sente preokupa tanba durante simu sálariu reforma nian la mensiona saláriu ba kargu, hanesan antigu administradór postu administratibu Nítibe no Pante Makasar.

“Ha’u nu’udar funsionáriu públiku, iha tempu ne’ebá ha’u nu’udar administradór postu administrativu Nítibe husi 2008 to’o 2014, depois iha 2017 ha’u nu’udar administradór postu Pante Makasar to’o 2024, maibé saláriu kargu ne’e la tama, tanba durante simu pensaun reforma $180 de’it, kompara ho kolega sira liu fali ha’u,” nia kestiona.

KFP sei rezolve iha Jullu no Agostu

Hatan ba preokupasaun sira-ne’e, Diretór Nasionál Sistema Informasaun Jestaun ba Komisaun Funsaun Públika, Moizes Pedroso, konsidera preokupasaun sira-ne’e importante,  tanba Komisaun Funsaun sei rezolve iha fulan-Jullu no Agostu.

“Kona-ba problema pensionista sira-ne’ebé asumi kargu antiguidade, sei halo ajustamentu ba mós saláriu antiguidade tanba ne’e imi nia direitu, maibé kuandu saláriu fulan tolu la simu, depois ami sie konvida fali atu haree fali iha sistema, tanba dadús sira-ne’e, submete mai husi kada instituisaun, ne’ebé direitu sei la lakon importante koordenasaun,” nia klarifika.

Jornalista: Abílio Elo Nini

Editór: Rafael Ximenes de A. Belo