VIKEKE, 22 Jullu 2026 (TATOLI)—Komemora Loron Nasionál Saúde ba da-XI (22 Jullu 2015-22 Jullu 2026), Prezidente Kámara Komérsiu no Indústria Timor-Leste (CCITL-sigla portugeza) Munisípiu Vikeke ho inisiativa apoia prémiu ba Ministériu Saúde (MS) hodi benefísia atividade dada rifa ba estudante no komunidade iha Munisípiu Vikeke.
Iha distribuisaun apoia ne’e, Prezidente CCITL Munisípiu Vikeke, Florencio Armindo da Conceição G. da Costa, haktuir Timor-Leste marka tan istória ida ba Komemorasaun Loron Nasionál Saúde ne’ebé realiza iha Munisípiu Vikeke nune’e Ministériu Saúde mós realiza kompetisaun dada rifa ba estudante no komunidade.
Notísia relevante: Komemora Loron Nasionál Saúde, MS realiza Marsa Saudavel iha Vikeke
“Tan ne’e, ami nu’udár setór privadu iha Munisípiu Vikeke sente orgullu, ho ida-ne’e ami apoia prémiu sira-ne’e ba ministériu hodi Komemora Loron Nasionál Saúde ba da-XI nian. Prémiu ne’ebé ita fó apoia ba kompetisaun dada sorteiu nian hamutuk item neen (6) mak hanesan bisikleta boot (1), rice cooker (1), kompor listrik (1), istrika roupa (2) no vintuña boot (1). Husi prémiu simples sira-ne’e hodi harame liután ita-nia serimónia Komemorasaun Loron Nasionál Saúde nian,” Florencio ba TATOLI iha kampu futeból Postu Vikeke Vila, Kuarta ne’e.
Prezidente CCITL Munisípiu Vikeke ne’e dehan CCTL Munisípiu Vikeke oferese apoia hirak-ne’e ba MS hodi reprezenta setór privadu sira-ne’ebé eziste iha Munisípiu Vikeke, atu hametin liutan amigavel entre setór privadu no MS.
Kompetisaun dada sorteiu ne’e alvu ba estudante sira no komunidade iha Postu Vikeke Vila. Kompetisaun dada sorteu referidu realiza iha kampu futeból.
Hafoin dada sorteiu, Vise-Ministru ba Fortalesimentu Institusionál Saúde (VMFIS), José dos Reis Magno, hamutuk ho autoridade lokál ofisialmente entrega direta ba manán na’in ne’ebé manán sorteiu kompostu husi estudante Ensinu Báziku Santa Maria Gorreti, Eskola Sekundáriu Santu Estevão, estudante Universidade da Paz (UNPAZ) no komunidade.
Jornalista: Vitorino Lopes da Costa
Editór: Xisto Freitas da Piedade
