VIKEKE, 21 Jullu 2026 (TATOLI)—Komemora Loron Nasionál Saúde ba da-XI (22 Jullu 2015-20 Jullu 2026), Ministériu Saúde (MS) realiza Marsa Saudavel hodi promove ema nia saúde no prevene moras.
“Atividade Marsa Saudavel mak hanesan programa saúde públika ne’ebé organiza husi Ministériu Saúde no parseiru sira. Atividade ne’e nia objetivu prinsipal mak atu promove ema-nia saúde, fó konxiénsia públika kona-ba prevensaun moras sira. Komemorsasaun ba tinan ida-ne’e ho tema: Ha’u-nia tasi, ha’u-nia Timor ba ha’u-nia saude,” Vise-Ministru Saúde ba Asuntu Fortalesimentu Institusionál Saúde, José dos Reis Magno ba jornalista sira iha edifísiu Servisu Saúde Munisípiu Vikeke, Tersa ne’e.
Governante ne’e dehan dalabarak ema han hotu toba no deskansa mak barak, ladún halo ezersísiu, entaun presiza deside loron ida tenke halo ezersísiu atu fasilita ema redús moras sira seluk.
“Aleinde Marsa Saudavel, atividade ba komemorasaun loron nasionál ne’ebé ita realiza iha Munisípiu Vikeke mak hanesan atividade futeból, voliból feto no konsulta saúde públika ba komunidade,” nia subliña.
Tuir observasun jornalista TATOLI Munisípiu Vikeke nota atividade Marsa Saudavel hahú tuku 07:00 Otl iha edifísiu Servisu Saúde Munisipál Vikeke nia oin no rota Marsa Saudavél mak hanesan husi Jardín 59 Vikeke Vila, edifísiu EDTL, Monumentu Don Jeremias, Igreja Vikeke Vila, edifísiu STAE no ramata iha kampu futeból Postu Vikeke Vila. Atividade ne’e hetan apoia seguransa husi Polísia Nasionál Timor-Leste (PNTL) Munisípiu Vikeke.
Atividade ne’e partisipa husi komitiva Ministériu Saúde, Autoridade Munisípiu Vikeke, Komadante PNTL Munisípiu Vikeke, Superintendente Xefe Polísia Euclides Belo, ekipa husi Hospital Nacional Guido Valadares (HNVG), Servisu Nasionál Ambulánsia Emerjénsia Médika (SNAEM, I.P.), Servisu Saúde Munisípiu Dili, Servisu Saúde Munisípiu Baukau, HOREX Baukau, funsionáriu Servisu Saúde Munisípiu Vikeke, estudante no komunidade iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
