MOKATIL no CAAKUB mak fornese ai-han lokál ba Programa Merenda Eskolár iha Bobonaru
BOBONARU, 22 Jullu 2026 (TATOLI) – Diresaun Servisu Munisipál Edukasaun (DSME) Bobonaru deside hodi envolve Movimentu Kamponezes Timor-Leste (MOKATIL) no Asosiasaun Sentru Atendimentu Agríkola Kuda-Ulun (CAAKUB) atu fornese ai-han lokál ba Programa Merenda Eskolár (PME) iha munisípiu Bobonaru, hodi asegura implementasaun programa ne’e no aumenta utilizasaun produtu lokál.
Diretór Servisu Munisipál Edukasaun Bobonaru, Miguel Freitas, hateten desizaun ne’e foti depois halo enkontru ho reprezentante MOKATIL no CAAKUB iha loron 06 Jullu, tuir orientasaun husi Primeiru-Ministru, Xanana Gusmão.
“Depois halo aprosimasaun ho CAAKUB no MOKATIL, ami konsege realiza enkontru no deside simu parte rua ne’e atu envolve iha implementasaun Programa Merenda Eskolár iha Bobonaru”, Miguel Freitas informa ba jornalista sira, iha salaun Maria Tapó, ohin.
Nia esplika katak CAAKUB hahú fornese foos lokál ba postu administrativu Maliana, enkuantu hahú loron 01 Agostu 2026 MOKATIL hahú fornese ai-han lokál ba postu administrativu neen iha munisípiu referidu. Tuir akordu ne’ebé iha, pelu menus porsentu 75 husi ai-han ba merenda eskolár tenke mai husi produsaun lokál.
Miguel Freitas konsidera modelu fornesimentu ne’e bele fasilita servisu Ekipa Jestaun Projetu (EJP) no koziñeira sira iha eskola, tanba MOKATIL no CAAKUB mak sei entrega diretamente ai-han bá eskola sira.
“EJP no tezoreiru sira la presiza sai bá halo kompras tanba MOKATIL no CAAKUB mak lori ai-han bá eskola, depois sira halo de’it prosesu pagamentu tuir apuramentu ne’ebé iha” Miguel afirma.
Iha parte seluk, Prezidente CAAKUB, António Barreto, haktuir katak asosiasaun ne’e hahú ona fornese foos lokál ba Programa Merenda Eskolár dezde Juñu 2026.
“Iha Junu ne’e ita fornese ona foos toneledas 10,6. Jullu tun uitoan ba tonelada 7,75, tanba loron efetivu ne’e tun. Iha Agostu ne’e sa’e ba tonelada 12,6 ne’ebé agora ita prepara hela, loron ida ka rua tan sira bele mai foti ona”, dehan.
Asosiasaun ne’e prontu fornese to’o loron efetivu tinan ne’e nia tanba stock hare-kulit iha armazein Soso sufisiente ho totál kuantidade tonelada 142.
António esklarese katak CAAKUB seidauk bele fornese foos-rai ba postu administrativu sira hanesan Atabae, Balibó, Kailaku, Bobonaru no Loloto’e tanba produsaun hare menus.
“Karik produsaun sufisiente ami prontu atu fornese ba postu administrativu neen iha Bobonaru. Ha’u atu motiva agrikultór sira tenke kuda no kuda. Asosiasaun CAAKUB prontu para sosa sira-nia hare, tanba agora merkadu permenente iha ona”, nia garante.
Tinan-tinan CAAKUB sosa hare-kulit husi grupu agrikultór 28 ho membru hamutuk 300-resin iha Maliana no loke tan mós oportunidade ba agrikultór sira iha Saburai, Tapo-Memo, Kailaku no Leolima-Balibó.
Notísia relevante: Monitorizasaun PME iha Bobonaru identifika diferensa fornesimentu nutrisaun ba estudante iha área urbana no rurál
Tinan ne’e, Bobonaru hetan alokasaun orsamentu ba Programa Merenda Eskolár ho totál millaun $1,8 hodi ezekuta ba loron efetivu 100-resin. PME tinan letivu ne’e implementa iha Pré-Eskolár Públiku 42, Ensinu Báziku Sentrál Públiku no Filiál 137, Ensinu Pré-Eskolár Katólika Privadu sia no Ensinu Báziku Katóliku Privadu 16.
Totál estudante benefisiáriu ba programa ne’e hamutuk 30.178, kompostu husi Pré-Eskolár Públiku 2.494, Ensinu Báziku Públiku 24.961, Ensinu Pré- Eskolár Katóliku Privadu 471 no Ensinu Báziku Katóliku Privadu 2.252.
Notísia relevante: EJP 38 asina kontratu ho Autoridade Munisípiu Bobonaru hodi implementa PME 2026
Jornalista: Sergio da Cruz
Editora: Maria Auxiliadora
