Kondisaun atuál Jardín Arte no Pintura Palaban no kompromisu Turizmu RAEOA

OEKUSI, 28 Jullu 2026 (TATOLI) – Xefe Suku Bobokase, Tomas Nessi, rekomenda ba Autoridade Rejiaun Administrativa Espesiál Oekusi Ambenu (RAEOA) atu hadi’a Jardín Arte no Pintura ne’ebé lokaliza iha arredór Palaban suku Costa sub-rejiaun Pante Makasar, tanba ekipamentu hanesan halimar ba labarik, toilet no lutu hetan estragu.

Xefe Suku Bobokase, Tomas Nessi, rekomenda, tanba Jardín ne’e konstrui iha 2023 gasta ona Orsamentu Jerál Estadu (OJE) maibé to’o daudaun ne’e fasilidade sira komesa aat ba bebeik ona.

“Fatin ne’e ita haree rame tebes, kada loron hetan vizita barakliu mai husi estudante sira, iha tinan hirak kotuk bainhira harii, kompleta ho fasilidade fatin ba desportu, fatin tuur inklui saneamentu ijiéne hanesan fatin soe lixu no haris-fatin, maibé agora ita observa buat sira-ne’e estragu ona, entaun presiza hadi’a no monta seguransa ruma atu tau matan, tanba lutu mós ita haree laiha ona, animál tama sai livre, ne’ebé Governu presiza haree tanba gasta ona osan ba fatin ne’e,” nia hateten ba jornalista sira iha Palaban Oekusi, sesta semana ne’e.

Aleinde ne’e, nia observa pintura sira-ne’ebé antes ne’e, tau iha parede komesa lakon inklui ai-funan sira mós komesa mate, tanba laiha morru atu asegura, tanba ne’e autoridade lokál ne’e rekomenda ba Autoridade RAEOA hodi konsidera atu hadi’a.

Notísia relevante:Governu rekoñese kompañia konstrutora jardín eroi sira iha munisípiu la’o tarde 

Hatan ba rekomendasaun ne’e, Diretora Jestaun Merkadu no Turízmu, Anastacia Eni, rekoñese fatin turizmu, arte no pintura daudaun ne’e nia kondisaun la seguru tanba fasilidade barak estragu tanba laiha lutu hale’u.

“Ita iha ona planu atu hadi’a iha tinan oin, la’ós fatin ne’e de’it maibé inklui fatin turízmu sira seluk, hanesan monumentu Lifau no iha fatin seluktan, tanba durante ne’e ami rekolla fatin turizmu sira iha Oekusi atu hadi’a iha tinan oin, ne’ebé agora sei faze identifikasaun liliu ba fatin sira-ne’ebé iha área urbana,” nia hateten.

Rekorde katak, iha janeiru 2023, Autoridade RAEOA aloka orsamentu hamutuk $4.113 ba reabilitasaun fatin turizmu haat neʼebé lokaliz iha suku Costa sub-rejiaun Pante Makasar.

Fatin sira ne’e mak Jardín Arte Pinta Morru lokaliza iha bairru Palaban, iha aldeia Sanane, Jardín Koreanu lokaliza iha bairru Oébau, iha aldeia Sanane, no fatin turizmu relijiozu rua mak hanesan Fatu-Suba iha bairru Sikluli, aldeia Sanane, no gruta Santo António Polsiba iha bairru Meok-Ana, iha aldeia Oésono. Obra ne’e halo husi empreza lokál Maysalu Unipessoal Lda

Jornalista: Abílio Elo Nini

Editór: Rafael Ximenes de A. Belo