Xanana konsidera konetividade kabu submariñu tenke integra ba setór dezenvolvimentu
DILI, 28 Jullu 2026 (TATOLI)—Primeiru-Ministru, Kay Rala Xanana Gusmão, konsidera prezensa konetividade kabu submariñu tenke integra ba setór dezenvolvimentu sira hanesan ekonomia no sosiál iha Timor-Leste.
Notísia Relevante: Governu ofisialmente lansa komersiál fibra ótika ba públiku
Primeiru-Ministru, Kay Rala Xanana Gusmão, hateten projetu ne’e sei sukat husi ninia kapasidade atu hadi’a populasaun nia moris.
“Kabu Timor-Leste fornese telekomunikasaun ho instituisaun públika ne’ebé responsável no tenke garante servisu hodi fó benefísiu to’o iha ita-nia populasaun,” Primeiru-Ministru, Kay Rala Xanana Gusmão, hateten iha edifísiu CTL, E.P, Bebonuk, ohin.
PM Xanana konsidera telekomunikasaun ne’ebé di’ak-liu sei apoia diversifikasaun iha Timor-Leste nia ekonomia. Timor-Leste labele depende beibeik ba reseita petrolífera ho despeza públika.
“Ita presiza dezenvolve setór produtivu, kria investimentu privadu no kria empregu ba ita-nia populasaun joven,” Xefe Governu dehan.
Líder nasionál dehan, tenke tulun estudante ho manorin na’in sira hodi hetan asesu ne’ebé di’ak-liu ba rekursu edukativu no ba aprendizajen dijitál.
“Tenke tulun profisionál saúde sira atu komunika ho médiku espesialista sira hodi partilla informasaun no presta servisu ne’ebé di’ak liu ba ema sira-ne’ebé hela dook husi Díli,” PM Xanana informa.
Aleinde ne’e, nia relata tan katak tenke permite timoroan sira bele asesu fasíl liu ba servisu públiku, hodi redús tempu no gastu finansiamentu iha deslokasaun ba repartisaun públika.
“Husi konetividade internet ne’e mós tenke tulun agrikultór, kooperativa ho empreza ki’ik sira atu hetan informasaun, bele hetan klientes foun no partisipa barak liu iha ekonomia nasionál, rejionál no internasionál,” nia dehan.
Ida-nbe’e atu tulun mós maun-alin ho feton sira-ne’ebé moris iha estranjeiru atu mantein ligasaun no sira-nia família.
Tanba ne’e, Governu hein katak infraestrutura ida-ne’e bele proporsiona servisu ne’ebé di’ak-liu no asesu ba família, eskola, klínika saúde, empreza ho komunidades iha Timor-Leste tomak.
Jornalista : Alexandra da Costa
Editór : Cancio Ximenes
