Materiál konstrusaun ponte Noebesi iha Naktuka to’o ona, sei konstrui iha tempu-badak  

OEKUSI, 30 Jullu 2026 (TATOLI) – Diretór Serbisu Rejionál Obra Públika, Remígio Nuno Sila, fó sai katak, konstrusaun ponte Noebesi Naktuka ne’ebé lokaliza iha bairru Naktuka suku Bene-Ufe sub-rejiaun Nítibe Rejiaun Administrativa Espesiál Oekusi Ambenu (RAEOA) sei konstrui iha tempu-badak tanba kompañia mobiliza ona materiál konstrusaun iha ona terrenu.

“Materiál konstrusaun ba ponte Noebesi iha Naktuka, kompañia mobiliza to’o iha fatin, maibé husi Autoridade RAEOA ita sei hein ekipa husi konsultáriu di’ak, tanba sira maka produs dezeñu, halo levantamentu, estudu kona-ba estatutu rai, no fulan kotuk sira aprezenta ona proposta BoQ ho orsamentu no mós dezeñu mai obra públika maibé to’o agora seidauk fó resposta mai fali, maske materiál sira preparadu ona iha térrenu, maibé ita garante sei konstrui iha fulan Agostu ou Setembru tinan ne’e,” Remígio Nuno Sila, hateten iha Oekusi, ohin.

Notísia relevante:PM Xanana orienta Autoridade RAEOA-ADN konstrui ponte iha mota Noebesi bá Naktuka

Dirijente Obra Públika ne’e fundamenta katak polítika atu ponte ne’e, Primeiru-Ministru, Kay Rala Xanana Gusmão, maka orienta direita Auroridade RAEOA, ho Ajénsia Dezenvolvimentu Nasionál (ADN), atu konstrui ponte alternativa ida iha mota Noebesi hodi fasilita bá komunidade sira iha Naktuka no Citrana inklui Polísia Unidade Patrollamentu Fronteira (UPF) bele movimentu ba mai ho séguru.

“Entaun tinan kotuk, Autoridade RAEOA hamutuk ho ADN, observa ona mota Noebesi nune’e bele prepara dezeñu no fatin konstrusaun,” nia afirma.

Notísia relevante:FOTO ATUÁL: Autoridade RAEOA observa direta mota Noebesi hodi konstrui ponte

Xefe Suku Bene-Ufe, Marcos Meni, rekoñese katak, daudaun ne’e kompañia harii ona sira-nia fatin serbisu iha mota Noe-Besi, no materiál sira hanesan ponte nian eskavadór to’o ona iha terrenu.

Aleinde ne’e mós traballadór sira balun komesa pinta ona materiál ponte nian, maibé to’o agora seidauk halo konstrusaun.

“Ha’u sempre ba halo monitorizasaun no husu sira dehan, materiál balun sei iha Dili, ita espera bele konstrui iha tinan ne’e, nune’e tinan oin ita bele utiliza ona ponte ne’e. Ita agradese karik realiza duni ponte ne’e, sei fasilita natar-na’in iha Naktuka kuaze 400 maka sei ultrapasa ponte ne’e, tanba tinan barak hakuur mota, depois sei fasilita mós seguransa UPF sira bainhira halo patrollamentu iha fronteira Naktuka inklui estudante sira asesu mai eskola iha Bítila aldeia Manán,” nia hateten.

Notísia relevante:Komunidade sira agradese Governu tanba reabilita estrada kilometru haat iha Naktuka

Jornalista: Abílio Elo Nini

Editór: Rafael Ximenes de A. Belo